La Usc di Ladins

Le proiet nasciü da na idea de Ivan Ellecosta, Noah Granruaz, Maximilian Irsara y Philip Profanter metô al zënter i produc dl post y la ciasadafüch de munt, sciöche al vëgn ince splighé tl titul: "Dal lüch al taí – l’aisciöda söl lüch, chef y derzades de munt". L’evënt é gnü a s’al dé en sabeda ai 30 d’aurí pro la majun dl Lüch da Sompunt a Badia. Feter 100 partezipanc é gnüs viziá dales delicatësses di chef Andrea Irsara y Nicola Acquasaliente dl Gourmet Hotel Gran Ander, le chef da stëres Stephan Zippl dl restorant 1908 y Rainer Castlunger dl NaturHotel Miraval de Badia. Dlungia la degustaziun dl menü da cater derzades, él ince sté trëi produturs che á podü presenté sü produc locai. Le proiet é sté por i cater studënc na pröma ocajiun por mëte en pratica les conescënzes che ai abina sö a scora: "Tl pröm pel saurí da organisé n evënt cun val’ chef y produturs, mo pormó canche an mët man, capëscion tan comples che al é y tan de tëmp che al ó ester por mëte en pe n proiet de chësta sort", dij un di organisadus. L’evënt á ince albü n tonn de solidarieté. Ci che é gnü trat ite, é jü a bëgn dl’assoziaziun "MOMO Alto Adige" che promöi cures paliatives por i mituns.