La Usc di Ladins

Tres n concurs davert a dötes les artistes di raiuns aministratifs dl Tirol, Südtirol y Trentin, metü a jí bele tl altonn 2021, â na iuria cernü 27 proiec. En chësc ann á spo 18 artistes albü la poscibilité da lauré danter i mürs dla fortëza storica por i mëisc de forá y merz, fajan deventé i locai atelier temporan, che á por val’ de ince daurí les portes a n maiú publich. Sëgn é les operes, che é nasciüdes te chisc dui mëisc, metüdes fora ti locai, che á podü deventé dan na desëna de agn ateliers creatifs y defata lerch por mostres d’ert.
Na saú de reconcuista de lerch por la prospetiva daldöt feminila, dá la mostra fata sö ti locai storics dl fort, avisa tla pert te chëra che al ê da ciafé al scomenciamënt dl 1800 les ciamenes di comandanc y di ofiziers austro-ungarics y talians.
Te chësc caje n’é dí che i mürs baia, degöna esageraziun: les scrizer­nades lasciades da sü abitanc, che é da odëi tres ciamó söi mürs, á cunté por agn de sü ghesć. Y sëgn a tó ite la lerch, danter dates de nasciüda, inoms, cognoms lasciá söi mürs dai soldas, él les operes de ciamps artistics desferënc, pian ia dala ert visiva a chëra performativa cina a chëra leterara. Vijiuns y inter­pretaziuns artistiches feminiles dla parora »identité« se mosciöda y se translatëia te materiai de vigni sort. Ince artistes ladines á tut pert ala mostra. Nadia Rungger, Julia Prugger, Mara Miribung en colabora­ziun cun Barbara Tavella á partezipé metan fora sües creaziuns.

Liede deplü tla ediziun nöia de vëndres 19 d'aurí !