Chisc dis él indó gnü daurí deplü ativités comerziales y artejanales y insciö él ince cotan de geniturs che á metü man da lauré y che adora insciö assistënza por sü mituns. La Junta Provinziala dl Südtirol á cherié dan da püch la fondamënta iuridica por l’assistënza te de pici grups. Tla sentada di 12 de ma tratarára l’assistënza de prescia por mitans y mituns dla scolina y dles elementares.
La Provizia scrí te n comunicat che "Al é preodü che i geniturs, che documentará la nezescité, podará bele fá domanda online por le sorvisc de assistënza d’emergënza da en mercui, ai 13 de ma, inant. I formulaurs sará online sön le portal internet dl'Aministraziun publica o sön la plata internet dl Departimënt Intendënza y Cultura ladina. En jöbia gnarál ejaminé les domandes y en vëndres ciafará i geniturs na resposta sce la domanda é gnüda azetada o manco."
Le sorvisc de assistënza piará ia cun en lönesc ai 18 de ma. Preodü él grups de 4 mitans y mituns por la scolina y 6 por les scores elementares. Döt gnará desfiré tignon ite les regoles de segurëza y de precauziun.
La Provinzia scrí inant che "cina ala fin dl ann de scora vëgnel garantí l’assistënza por mitans, mituns, jones y jogn cun handicap, ma sce i geniturs mëss jí a lauré fora de ciasa y ne pó nia lauré te da ciasa. Por le momënt él i surastanc dles scolines y dles scores che stlarësc les modalités spezifiches dl’assistënza, adöm cun le personal de scores y scolines."
Sorvisc d’emergënza tles scolines y scores elementares
En lönesc ai 18 de ma pëion ia tl Südtirol cun n sorvisc de prescia por l’acompagnamënt di mituns. Les modalités avisa vëgn definides ai 12 de ma tla sentada dla Junta Provinziala
Galaria retrac
View the embedded image gallery online at:
https://www.lausc.it/atualite/12630-sorvisc-d-emergenza-tles-scolines-y-scores-elementares#sigProIdf9b138befb
https://www.lausc.it/atualite/12630-sorvisc-d-emergenza-tles-scolines-y-scores-elementares#sigProIdf9b138befb