La Usc di Ladins

Fèr crescer la cognoscenzes e la competenzes di sozi e de la comunanza tel setor de l’economia l é un di obietives che la Cassa Raiffeisen se met dant. Per chest a la fin de mèrz l’à endrezà na scontrèda informativa aló dal Hotel Olympic de Sèn Jan, olache a rejonèr de inflazion e tasc de enteres l é stat envià n inom de nonzech: l professor Alex Weissensteiner, jà cernù per tor su chest an l’encèria de Retor de l’Università ledia de Busan.

»Te anter le miscion de noscia banca – à dit l consulent de la Raiffeisen fascèna Riccardo Donei – l é ence chela de crear mingol de cultura finanziaria te anter la comunanza.«

Weissensteiner à rejonà dant da dut de la vejinanza anter Trent e Busan, recordan che te l’Università de Busan l é l 20% de studenc che vegn dal teritorie trentin e ence da chesta valèdes: joegn che vel studièr, lurèr, crescer e fèr crescer sie teritorie.
Na pianta staifa tegn fora l vent – à dit Weissensteiner – la é bona de se dobièr zenza se crepèr: l’inflazion chèla e la é sot control, tant che se peissa che del 2025 la posse ruèr al 2-2,5%.

Ai 19 de oril dapò la Cassa Raiffeisen Schlern Rosengarten à endrezà ence sia radunanza ordenèra jun Busan, ma desche semper dant, ai 12 de oril, l é stat metù a jir na pre-radunanza te Fascia per ge portèr dant duc i dac ai sozi de val. La neva senta de la Filiala de Fascia, inaudèda de dezember del 2023 a Sèn Jan, se à desmostrà sorida e efizienta. L an 2023 se à serà su con n utol de ejercizie de 8.211.322, smaoran belebon chel de 5.092.424 che aea serà su l an 2022.

De più su La Usc stampèda de en vender ai 3 de mé.  (LG)