La Usc di Ladins

L é stat na sajon longia, ma sessaben che l temp passa coran canche se se gode. La sajon di Falcons tel setor mender é stata piena de sodesfazions, e amò n sarà ajache no duta la formazions à serà su sia atività. Vardon en curt la situazon te ogne categoria.

En domenia ai 17 de mèrz l é jit en scena l ultim tornoi da calandèr per la categoria U.10. Do la diesc giornèdes de atività de Comitat, duta la 8 formazions trentines de U.10 les se à troà fora Ciavaleis per l tradizionèl tornoi de fin sajon. Tornoi da peconc, sessaben, olache per la pruma outa te chest an duta la formazions se à scontrà e jià de contra. Hockey, ma no demò. A la fin de ogne partida i bec se à mesurà su la giacia ence col jech de trèr la fun. A la fin del tornoi duc i bec é stac premié per sia braura e i à podù jir a cèsa stencé ma trop contenc. 
En domenia ai 17 à serà su sia sajon ence la formazion U.14 e ence l Fiem/Fascia U.16 à podù fèr festa te sia ultima partida de la sajon. 

De più su La Usc stampèda de en vender ai 22 de mèrz.  (Daniele Verra)