La Usc di Ladins

"Ie é bele arjont n gran travert a me cualifiché per i Juesc Olimpics. Duta l'autra atletes ova doi sajons de Copa dl Mond per se cualifiché. Ie é permò scumencià chësta sajon a fé garejedes de Copa dl Mond y propi mé al ultim sons mo stata bona de me cualifiché. Nscila ovi perdrët bele arjont chël che ulove", nes à dit la jëuna Maria Gasslitter, 19 ani, n cont de si partezipazion ala Olimpiades. Davia che la legrëza fova tan granda y la ne n'ova nia da pierder, fòvel per ëila dantaldut mpurtant pudëi se devertì y se goder chësta prima esperienza pra i Juesc Olimpics.

Nscila àla afruntà la garejeda de cualificazion dla disciplina dl slopestyle de n sada passeda cun cuer lesier. Tl snow park de Livigno iela stata bona de se davanië l ultim plazamënt de utl per se cualifiché ala fineles, ruvan 12ejima cun 54,66 ponc.

N lunesc ai 9 de jené l gran mumënt: la fineles de slopestyle dan a n publich de cësa y cun la bedaies olimpiches belau da arziché. "Dan la finela ei dit che pee via, che me gode chësta trëi runs y che dé l miëur che é. Nscila ei nce fat. L fova n beliscimo di y son stata bona de purté ju doi de mi trëi runs, nia dldut zënza fai. Tla terza y ultima run sons tumeda sun l ultim saut, ma per fertuna ne me ei nia fat mel. Son mpomo drët cuntënta de coche la ie jita. É nce fat n trick nuef che ne n'ove mo mei purtà ite te na garejeda", nes à cuntà cun sudesfazion Maria. Cun 50,33 ponc tla prima y 52,45 ponc tla segonda run iela ruveda ala fin dla finedes 10ejima. "L ne me sá belau nia da crëier che da mi prima Olimpiades ei bele arjont n resultat tan aut", à la atleta dit.

Elisabeth Kostner

L articul ntier tla edizion nueva de La Usc di Ladins de n vënderdi ai 13 de fauré.