La Usc di Ladins

Al ê le 1975 canche Pater Ujöp Frëinademetz da Oies ê gnü detlaré Beat dal papa Paul VI ai 19 d’otober, tla gran dlijia de San Pire a Roma. Por chësta ocajiun ê deplü Ladins jüs a Roma por tó pert al evënt. L’ann dedô êl gnü organisé a Oies da n comité spezial na gran festa ince por la jënt che n’â nia sciafié da rové jö tla capitala taliana. De chësc evënt se recorda ciamó n val­gügn, dantadöt por süa particolarité.

Te La Usc di Ladins dl 1976 dl 1. messé, él reporté la gran festa che se desfirâ dan da 50 agn a Oies. Ara se tratâ de n gran evënt, a chël che i redadus ti â dediché tröpa lerch. La Usc di Ladins scrí: »Cër 15.000 persones s’é abinades ai 30 de ma a San Linert, paisc nadé dl Beat P. Ujöp Frëinademetz«.

Al rovâ jënt da indlunch adalerch scrí i redadus: »Dales cater valades ladines, pelegrins da foradecá, dles vals de Puster, dl Isarch y dl Adesc, dles provinzies confinantes de Trënt y Belun y finamai jënt da defora dai confins«; sides jënt jona co manco jona â tut pert.

Cun deplü prozesciuns cun ilo­minaziun y mësses abelides dai cors de valada, â la festa sö a Oies doré plü dis alalungia.


Te La Usc di Ladins de vëndres ai 6 de forá, ciafëise deplü da lí sön l'evënt, reporté ince tl foliet ladin dl 1976!