La Usc di Ladins

En domenia ai 30 de aost l é stat n domesdì de festa e de emozions al Gianmario Scola de Dèlba per sostegnidores, familières di atlec, sponsor e autoritèdes politiches, aministratives e de scola per la prejentazion ofizièla de duta la squadres de la sozietà sportiva HC Fascia Falcons, dai più picoi a la pruma squadra. Endèna i intervenc da pèrt de la senatora Elena Testor, del assessor regionèl ladin Luca Guglielmi e del ombolt de Cianacei Giovanni Bernard l é stat sotrissà soraldut l’emportanza del Fascia desche pont de referiment de gran emportanza sozièla per duta la comunanza de la val. N rengraziament particolèr ge é stat fat a responsaboi, compagnadores e tecnics de la squadres che con pascion e dedizion se spen dì per dì per l moviment. E a la fin n batiman de recognoscenza da man de duc i prejenc a la storica secretèra Sabina Pegoretti per l lurier fondamentèl fat te duc chisc egn.

En dut l é stat prejentà su la giacia 174 atlec che roda dintorn al mond di Falcons: 142 de Fascia e, de gra a la colaborazions envièdes via, ence 16 che vegn da Fiem e 9 da Pèdua. Amò apede n tous da Auronzo e un da Feltre. Te la squadra maora l é ence 2 ucrains, 2 italo/svedeisc e 1 finlandeis. Donca, na familia n muie grana che comporta n lurier de gestion de gran empegn, ma ence de sodesfazions.
Ades per i Falcons ladins cef e giames outes al campionat de IHL che scomenzarà ai 19 de setember con la trasferta a Perjen. Coach Ambrosi vivarà sobito da protagonist l confront diret con sie passà, tel stadie che l à vedù dant jiador e dapò arcedador de le ‘Linci’, portèdes acà vèlch an al titol talian. Sarèl de bon augurie?

De più su La Usc stampèda de en vender ai 4 de setember del 2026

 (Giorgio Pedron)