La Usc di Ladins

Da la colaborazion anter la universitèdes de Verona, Trent e Busan l’é nasciù l projet VinKo, Varietèdes en contat, che se met dant la valorisazion e l studie di lengac de mendranza e di dialec de Venet e Trentin Sudtirol luran fora i dac regoec travers registrazions audio de chi che rejona.

La creazion de na piataforma online à permetù ai enrescidores de regoer travers crowdsourcing na gran cantità de informazions linguistiches su dialec e rejonèdes locales che fèsc pèrt tant de la familia romanza, desche i dialec trentin e venec e la desvaliva variantes del ladin, che de la familia germanica, desche i dialec tiroleres, l cimber e l mochen.

L pont de forza de la regoeta, che anché dombra beleche 500 partezipanc per n total de 30 mile registrazions audio, l’é sie azes scempie e sorì: dò esser rué ite tel sit VinKo se pel tor pèrt a la enrescida registran la respostes (curta traduzions dal talian standard a sia varietà de paroles, frases e vignetes) diretamenter da fonin o computer.

VinKo se met dant doi obietives: da na man analisèr coche l contat anter la desvaliva varietèdes pel influenzèr e mudèr vèlch un di aspec che caraterisea i lengac medemi, descrivan tel detai coche se palesa chest mudament linguistich, da l’autra smaorèr la consaputa del multilinguism te la popolazion, valorisan e sostegnan la rejonèdes locales che, enceben che segn de gran richeza linguistica e culturala del teritorie, de spes les risia la estinzion.

Duc é envié a  tor pèrt al projet a na vida ativa, per maor informazions per pel jir sul sit: www.vinko.it opura travers mail a la direzions: vinko@unitn.it, vinko@ateneo.univr.it e birgit.alber@unibz.it.

De più su La Usc stampèda de en vender ai 16 de oril del 2021  (cri.m)