La Usc di Ladins

L Sorastant de la La Scola Ladina de Fascia Federico Corradini fèsc a saer che vegn metù a jir corsc de lengaz ladin per la jent, tant per chi che vel scomenzèr a entener, rejonèr e lejer l lengaz de mendranza, che per chi che i lo sà jà, ma i vel l perfezionèr e smaorèr sia competenzes ence tel scrit.
L é pervedù de peèr via en lunesc ai 19 de jené con n cors de livel A1/A2 - CCER per prinzipianc; chest cors arà regnèda 35 ores, l jirà inant fin ai 8 de mé del 2026 te senta del liceo scientifich a Sèn Jan, de lunesc e per 4 outes de vender, da les 19:30 a les 21:30. L cors é tegnù da Nicoletta Riz e l vegn metù a jir se l é amancol 8 enscinué.
Con mèrtesc ai 27 de jené l é enveze pervedù de peèr via con n cors de livel mesan B1/B2 – CCER, che l jirà inant a dis alterné de mèrtesc, mercol e jebia sera, semper da les 19:30 a les 21:30 te senta del liceo scientifich a Sèn Jan. L cors é tegnù da Sara Merighi e l vegn metù a jir se l é amancol 8 enscinué; en mèrtesc ai 20 de jené da les 19.30 l é la prejentazion e l test de competenza per l’amiscion.
Duc doi i corsc à n cost de 100 euro ma i é debant per i sentadins de Fascia che à manco che 20 egn. Per informazions, iscrizions e paament l é da se oujer dant dai 12 de jené te la Scola ladina de Fascia a Daniela Vian, telefon 0462 760340 int.8, mail ufficioamministrativo@scuolaladina.com.