La Usc di Ladins

L é stat n bon an l 2025 per la Coprativa Oltre. A portèr dant mingol de bilanz su l’atività de chest ent de promozion sozièla de noscia valèdes, atif forin Fiem soraldut con Maso Toffa e te Fascia con l Laboratorie Ensema, l é stat l president Claudio Demarchi, confermà chest an a cef del nef Consei de Aministrazion, olache l é ruà ite ence Candido Zanoner da Moena, che l se cruzia particolarmenter del laboratorie Ensema a Ciampedel e l se à jà desmostrà n muie atif.
En jebia ai 18 de dezember, apontin a Ciampedel te la Boteiga Ensema l é stat endrezà n moment spezièl olache utenc e familiares, referenc, colaboradores e aministradores, volontères, amisc e duc chi che ge stèsc apede a la Coprativa Oltre, i à podù se troèr per stèr mingol adum e se fèr i augures de bona festes.
La boteiga era duta fornida da festes, dalbon piena de robes de legn picoles e granes, realisèdes dai utenc tel laboratorie de tislerai Ensema: na bela perferida per fèr vèlch don da Nadèl.

Se pel lejer dut su La Usc nr 50 dai 24 de dezember, che se pel troèr ence te la boteighes de sfoes. Sul sit se per fèr l abonament al e-paper per aer azes vigni vender a dut l sfoi sul fonin, tablet o computer.


 (Lucia Gross)