Te l’ultima sentèda de Consei del 2025 l ombolt Valerio Pederiva à portà dant na sumèda di lurieres fac e de chi en program. L à rejonà ence de la varianta al Pian Regolador General
En lunesc ai 22 de dezember l é stat chiamà ite l’ultima sentèda del Consei de Comun de Soraga per l an 2025. N muie i ponc al orden del dì anter chisc ence l’aproazion de la mozion del Consei de Comun de Cianacei, che é ruèda ence en vender passà te Consei General, per la defendura del inom ’Reina de la Dolomites’ de la Marmolèda. A la fin del Consei l ombolt Valerio Pederiva à portà dant na sumèda del lurier fat te chisc prumes meisc de sie mandat. Anter i lurieres porté a compiment l é l marciapé sun stradon tedant gejia che l é stat slarià, l’enlumenazion del ciampanil de Barbida, i intervenc ló da Malga de Mez e sun strèda de Valfreida. L ombolt à ence metù en consaputa di lurieres dac su e da fèr chisc meisc
che vegn. L à uzà fora la colaborazion con la Coprativa Oltre che à fat i fornimenc da Nadèl de paisc, col Comitat Marcialonga che à enjignà la pista de la neif per i bec te Pra del Preve e l gran lurier del Comitat Manifestazions. L à rejonà ence del Pian Regolador General: »La Provinzia à domanà autra integrazion al document, l Comun cognarà ge dar su la enciaria a n nef tecnich do che l é mencià l’architeta Francesca Volpetti che aea metù ju l pian e de chest cognarà se cruziar l Secretar de Comun ensema al Comissar ad Acta – à dit l ombolt Perderiva. Speron che ades i tempes se scurte ence se sion jà enjigné a l’idea che l Pian no speiarà deldut la volontà de l’Aministrazion.«
Tinultima l’assessora a la cultura Cristina Buso ge à dat fora i stipendium ai studenc meritegoi per l an de scola e academich 2023/24 che l é: Isabella Giuliani (laurea te gestion aziendala, 110 e la lauda), Mara Pellegrin (laurea trienala de matematica, 99/110), Mattias Rosso (laurea en enjegneria industriala mecanica, 108/110) e Caterina Zulian (master laurea trienala te interior design 28/30).
(Monica Cigolla)
