La Usc di Ladins

Chisc dis passé se à slarià fora en prescia la neva che sot la festes da Nadèl no vegnarà orì l zenter traumatologich ló dal Distret sanitarie de Sèn Jan ajache no se troa l personal sanitarie. Chesta neva à sobito fat cruzièr la Aministrazions de la val e i operatores turistics e ence soscedà n muie de comenc sui social. Se ogne outa che se fèsc mèl valgugn sui portoes dai schi ge vel i portèr fin al ospedèl de Ciavaleis e empegnèr la ambulanzes per trei ores demò de viac, se risia che la val zede dal pont de veduda sanitarie soraldut sot la festes canche la val se empienesc de ghesć.

Anché, en Sèn Stefen, l grop de Consei provinzièl Fassa à manà fora n comunicat sotescrit dal conseier provinzial ladin Luca Guglielmi e dal procurador del Comun General de Fascia Edoardo Felicetti.

»L conseier provinzial ladin Guglielmi e l procurador del Comun General de Fascia Felicetti palesa gran cruzie per la dificoltèdes a orir l zenter traumatologich de Sèn Jan – vegn scrit tel comunicat. Ge era stat dat garanzies che l zenter fossa stat avert ai 28 de dezember, ma demò acà pec dis ge é stat fat a saer che no l é possibol respetèr la data a cajon de la mencianza de personal che al ultim se à tirà en do. Guglielmi e Felicetti à sobito contatà l Assessorat a la sanità e chel al turism de la Provinzia de Trent, e ence la categories economiches e de promozion turistica de la val, per troèr na soluzion al problem. N problem che per auter é condividù con Madonna de Campiglio che se troa te la medema situazion, a desmostrazion che l é slarià fora. En conscidrazion de la mencianza de personal sanitarie che no l é n problem demò de la Provinzia de Trent, ma a livel nazionèl, la creazion de l’università de medejina e la neva Azienda sanitèra universitèra integrèda del Trentin, voluda da chesta aministrazion provinzièla, raprejenta na oportunità per formèr fegures profescionèles competentes e ge fèr front tel davegnir a la mencianza de personal sanitarie – à dit Guglielmi e Felicetti.

L Procurador e l Conseier provinzièl ladin seghita a lurèr per troèr soluzions al problem e consentir che vegne avert l CTO de Fascia dant che l é meso.«

 (MCI)