Ti Stac Unii Sirio Talmon, che à na malatia rèra che ge à ciapà i nerves, l à rejonà con sacotanta jent e l à podù descorir l’»America de la jent«. Endèna boi te sia pegnata jà n’autra endesfida per l an che vegn.
Te l’ultima edizion de La Usc del an passà, dant da Nadèl, ge aane fat na intervista a Sirio Talmon, maester de schi da Cianacei e ziclist per pascion: l ne aea contà de la sindrome de Guillain-Barré, che l aea ciapà dant da doi egn te na forma grieva - na malatia che ciapa i nerves che no i ge dèsc più segnai ai muscoi. L ne aea contà ence del viac de passa 5700 km che l volea fèr ti Stac Unii. Embendapò, n an l é passà e Sirio chel viac l lo à fat: l é pontà via da New York ai 28 de aost e l é ruà enscin te la California, passan per la Historic U.S. Route 66, che da Chicago rua fin a Santa Monica. Sion jic enstadì a l domanèr fora per descorir coche la é jita.
Co éla stata pedalèr 5700 chilometres? Sirio Talmon Bel l é stat. Sion passé te 21 Stac. Per via del catitemp o de la strèda che mencèa, no é podù fèr duc i 5700 ma ‘bele’ 4800. A jir no l é stat nesciugn problem: a livel fisich stajee polito ajache vindedò l é stat na gran preparazion vedù proprio mia particolarità. Siere segur al 100% de poder la fèr. L é stat lench: é ciapà l’èga, freit, vent, vèlch dì n muie tof. Soraldut tel Missouri e te l’Oklahoma l era 35/40 degrees de ciaut e tumech, n tempram pesoch; alincontra tel desert del Mojave te la California l era ciaut valif, ma sut e sech, che no l te smoèa.
Da la California sion vegnui de outa fin tel Stat de New York, con mia femena col camper, e sion passé enveze ti Stac più a nord. Chesta no l era na pèrt programèda ajache cognaane vegnir de outa col aereo ma se aon pissà de la fèr coscì vedù che stajaane ite co la giornèdes. Canche jie co la roda no la me vegnia semper do ajache no duta la strèdes se podea les fèr col camper: aane ponc olà se scontrèr coscita la podea me dèr èga o da magnèr.
Podede lejer duta la intervista su La Usc stampèda nr 50 de en mercol ai 25 de dezember del 2025
(Nicoletta Riz)
