La Usc di Ladins

I era de passa 30, i picioi che en lunesc ai 15 de dezember i à portà dant te gejia de Pera n belot conzert per ge augurèr bon Nadèl a genitores, familiares e amisc, ma ence a duta la comunanza.

Na gran endesfida per chisc bec, che i se à emparà ite diesc cianties, toutes dal repertorie tradizionèl de diesc Paijes desferenc, vèlch una ence tel lengaz original, studièdes e proèdes te 10 lezions.

L conzert é stat avert dal president de la Scola de musega Il Pentagramma Stefano Lazzer, ajache »Nadèl Traslamusega«, chest l titol, l é nasciù da n projet che à metù adum sia Scola, e en particolèr la sezion de ciant col Maester Ilario Defrancesco, e l Istitut Cultural ladin, che te la scomenzadives per sie mez secol de vita l à pissà de se oujer ence a la desvaliva realtèdes musicales de val.

Ai bec del »Coro Verde« del Pentagramma se à coscita jontà ite etres bec, de na età mesèna anter i 8 e i 12 egn, e duc ensema i é stac compagné te chest viac tel mond tras la musega.

Anterite no podea mencèr amancol na ciantia per ladin: »Jon a Maitin«, cianzon da Nadèl trop cognosciuda e nasciuda da la musega de Fabio Chiocchetti su la paroles de P. Frumenzio Ghetta, la era ampò neva per n muie de picoi ciantores. Apede a chesta, vidé dal Maester Ilario Defrancesco, i picioi à emparà ence cianties de tradizion ceca, todescia, polaca, boema, slovaca, ingleisa e amò trei toc, de tradizion rumena, spagnola e americana, porté dant tel lengaz originèl.

Dut l articol su La Usc stampèda nr 50 de en mercol ai 25 de dezember del 2025.

 (LG)