La Usc di Ladins

Canche taca a se arvejinèr la fin de n an per solit se fèsc n bilanz de chel che l é stat. La sezion del CAI SAT Auta Fascia aessa volù endrezèr la radunanza di sozi ma per costions de temp e de endrez no l é stat l met e la é stata coscita sburlèda al an che vegn. La presidenta Licia Favé e la secretèra Maria Assunta Merli vel fèr a saer che la é stata metuda sul calandèr en lunesc de Pèsca, ai 6 de oril del 2026. Sarà na scontrèda de gran emportanza ajache vegnarà consegnà i diplomes ma soraldut vegnarà renovà l diretif. Ajache la presidenta no pel più se tor su chesta encèria vegn chierì jent che se mete a la leta. Ence la secretèra Merli à fat a saer che la ge lascia bolentiera l post a zechei de etres, aboncont duta does seghitarà a ge stèr apede al grop.

»L Cai Sat Auta Fascia dombra n bel numer de sozi, en dut 284 – disc Merli - l é n bel da fèr a ge stèr do a duta la scomenzadives e per chest l é stat pissà de smaorèr l diretif da 7 a 9 a na vida che sie più jent che pel dèr na man; volassane che ogneun se tole su n setor, chi che ge stèsc do ai joegn, a la scoles, ai troes, a la raides, ajache l é semper ence più burocrazia.«

Na bela colaborazion anter la trei sezions de val

Via per chest an l Cai Sat Auta Fascia à endrezà n grum de ativitèdes. »Na roba neva e n muie positiva che volon uzèr fora l é l’atività intersezionala con i etres doi gropes de Fascia – disc Merli e Favé. D’istà, col grop de Moena capofila, l é stat fat l trekking de la traversèda del Pas de Sèn Pelegrin per ruèr al Role passan per l Valles, dapò l é stat fat la raida dintorn al Sela e n muie bel l é stat l trekking de la Veisc, 12 tapes da la Marmolèda a Lavis. Enstadì aon fat chela de Trent con la vijita a la Cèsa de la Sat e al Ciastel del Buonconsiglio, mencia amò l’ultima tapa de Cembra-Lavis. Sion semper stac de n bel grop, presciapech de na ventina, l é bel percheche se veit lesc che no se cognosc.

Dut l articol su La Uasc stampèda nr 50 de en mercol ai 25 de dezember del 2025.

 (Monica Cigolla)