La Usc di Ladins

L tem de la pruma cèsa l é endò vegnù sora èga enstadì. La discuscion é stata envièda via dal Grop de Consei Diretif de la Neva UAL che tras n comunicat à volù scorlèr su la istituzions provinzièles e si raprejentanc fascegn percheche vegne metù sun desch la soluzions con intervenc concrec e svelc. Dut l é pontà via dal post de na agenzia imobiliara de la val per vener n cartier te n condominie fat su acà desvalives egn. »L priesc domanà é de passa 7.800 auro al metro cadrat per n valor complessif de passa 600 mile euro – vegn scrit tel comunicat de la Neva UAL che moscia ence l anunzie online. Chel che fèsc più marevea l é stat la reazion del marcià: te nience doi dis l post à ciapà passa 500 domanes de informazions da man de jent fora de la val che era enteressèda a comprèr. Numeres che moscia coche la prescion de la domana de foresć sie n muie auta e chesta deida a slonfèr, l é ben da capir, i priesc del marcià. Na situazion che empedesc a na familia fascèna con n vadagn mesan de competer sul marcià del post.
Ne endespièsc veder che tedant a chesta situazion no sie reazion da man de la istituzions provinzièles – scrit la Neva UAL tel comunicat - che é states informèdes e domanèdes fora e che se moscia sordes a la domana de aiut ence se les sà de aer i strumenc normatives per poder didèr e meter dant soluzions adatèdes a ge fèr front a chest problem. Avelesc che ence i raprejentanc fascegn te la medema istituzions provinzièles e nazionèles no se tole su chest problem e i lo mete dant desche priorità al orden del dì. L temp l é fenì e la jent no à amò ciapà responetes e soluzions.«

Te Comun General de Fascia la costion de la pruma cèsa ge stèsc a cher al procurador Edoardo Felicetti che à enciarià l conseier Luigi Marchetti de ge stèr do e l é stat metù su n grop de lurier aposta con ite Marchetti per la maoranza, Amedeo Valentini per la mendranza e Mirella Florian per l grop mescedà. Aon sentù l procurador Felicetti per saer se l é stat envià via vèlch scomenzadiva.

Co siede do a lurèr te chest moment con l grop de lurier?

Edoardo Felicetti Te chest moment con l grop de lurier per la prima ciasa se rejona de tante scomenzadive che se podessa far, che dapò te Consei de procura e con i ofizies vardon de svilupar. Se aon conzentrà trop su co far a meter a la leta cartieres a fit per temp lonch. La colaborazion con la Fondazion Trentino Abitare va de chest vers, apontin per ge dar mingol de segureza ai patrons di cartieres percheche i podesse aer na segurtà a i dar a fit. Segurtà de esser paié e te la gestion di raporc con la jent che va int.

La Fondazion Trentino Abitare ruarèla te val a prejentèr sie projet?

Ei, aon endrezà na conferenza stampa en lunesc ai 14 de setember. Vegnarà su i dirigenc per spiegar miec l’operazion e noi diron percheche aon volù tacar via chesta colaborazion. Sion do che laoron per copiar che che l é stat fat te autre comunità de val per ge dar n aiut economich a chi che met a la leta si cartieres per contrac per tempes lonc.

Duta l'intervista su La usc stampèda de en vender ai 4 de setember del 2026




 (Monica Cigolla)