La Usc di Ladins

En sabeda ai 29 de novëmber él gnü a s’al dé l’inau­daziun cun benedisciun dl implant nü »La Crusc 1« a Badia. La mëndra festa, che s'á desfiré pro la staziun a val a San Linert, é jüda ala per cun la daurida bonoria dl implant.

Autorités politiches sciöche le senatur Meinhard Durnwalder, l’assessur ladin Daniel Alfreider y l’ombolt de Badia Christian Pedevilla, sciöche ince rapresentanc dles forzes dl ordin, azionisć, colaboradus, proprietars di terac y n valgügn rapresentanc dles dites che á colaboré por la realisaziun, é rová adöm por festejé deboriada cun i proprietars dl’aziën­da la conclujiun di laurs.

L’implant nü é gnü fat sö dala firma Leitner y é un de ultima generaziun: les cabines panoramiches é da 10 posć, cun scagns scialdá. Ares porta la jënt te n tëmp de gnanca sis menüc dal paisc de Badia cina sö dal santuar da La Crusc. La portada dl implant nü, é de 2.400 porsones al’ora, partides sö sön 57 cabines.

»Por Badia á le santuar da La Crusc n gran valur, al é n post unich por süa belëza, olache tradiziun y spiritualité röia adöm. De chësc sunse braui«, á stlüt jö le presidënt Luigi Frenademetz, denanche taié la vëta.



Deplü podëise lí tla ediziun nöia de vëndres, ai 5 de dezëmber!