La Usc di Ladins

Al pe forsc n parados, mo gonot ésera propi insciö che rodunt dai evënc tragics, dala plüra y dala mancianza, florëscel ince de beles flus. Insciö ésera stada pro la musizista Emma Moling, che â dl 2015 pordü so jorman Luca Valentin te na lovina sön Valun. Da chësta desgrazia él nasciü te ëra l’impuls, bëgn ince le bojëgn, da mëte en pe valch che podess tigní via süa recordanza. Le resultat é gnü val’ ann dedô, tl proiet "Lassö – n conzert por te".
"Lassö" stá por na linia de conzerc, che nasc por recordé porsones che á pordü la vita sö por munt. Cun i familiars, i compagns y düc chi che ó tó pert, vëgnel pité n tëmp deboriada danter musiga, natöra, pinsiers y recordanza, amez la belté dla contrada da munt. La pröma ediziun ê garatada ala fin d’agost dl 2023 ti pra dlungia la ütia Franz Kostner a Corvara, olache an â recordé 4 porsones che á messü lascé la vita te chël raiun. En domënia ai 30 d’agost él sté le secundo apuntamënt, en chësc iade ti pra dlungia la ütia Pralongiá. De chi versc êl gnü a mancé edl 2009 Othmar Costabiei da San Ciascian, mort dal bot tratan na escurjiun cun i schi. Insciö é le pinsier sté chësc iade dantadöt por ël. 

Deplü podëise lí t’La Usc di Ladins di 4 de setëmber  (pablo)