La Usc di Ladins

Tratan l’isté ne n’á i paurs nia ma da lauré ite i lüsc y les campagnes, mo sön so calënder él ince i campionac provinziai da sié de falc, che é gnüs a s’al dé en chësc iade ai 22 d’agost a Völser Aicha. Pro chësta manifestaziun, organisada dala Jonëza da Paur dl Südtirol deboriada cun i Seniors dla Uniun di Paurs, él gnü sié jö cun gran förtl y maestria bëgn 120 sperses de pre. Chiló ne nen jôra nia ma da ester asvelc y gaierc, mo la juria ciarâ ince tan nët che le tái é sté. Tignon cunt de döt chësc, pón dí che gran parüda á indô fat i setusc jogn de Mareo, che á metü a saul döes devëntes y dui podesć.
Chësc vel in primis por Maria Burchia, la campionëssa da sié dl ann passé, che é ince en chësc iade stada bona da confermé le titul pro les ëres. Cun le tëmp total de 2:39,31 ára davagné dan da Daniela Kofler dl Sarntal y Katja Mittelberger da Vöran. Ince so fre Andreas á fat süa parüda, davagnan tla categoria di iuniors. 

Deplü t’La Usc di Ladins di 4 de setëmber