La Usc di Ladins

Parenc e amisc i spetaa de saludar prest P. Alberto Dellagiacoma, che l aea jà programà de vegnir te la Talia d'aisciuda del 2026. Ai 3 de jugn l aea compì 86 egn e de chisc 56 l li à passé tel Ecuador, olache l era jit desche miscionarie salesian del 1969. Ti ultimes egn valch problem de sanità ge à permetù, e ence emponù, de vegnir mingol più de spes te la Talia, ma soa tera l era oramai l'Ecuador e d'uton del 2024, de 85 egn compii, no l aea bazilà a se n jir amò na outa: «aló posse amò esser mingol utol, jir a troar i malé, dar la comunion, confessar» l ne aea dit dant de pear via.
Diejem de 11 frades, P. Alberto l era cresciù te la familia del Malghèr da Poza, che ge à dat a le miscion ben 5 fies. P. Vittorino, P. Carlo e P. Raffaele i era jic duc trei te l’Africa coi comboniegn e oramai da egn i é sun Paradis; suor Gisella, do esser stata coi salesiegn tel Sud America per passa 60 egn, la maor part ence ela tel Ecuador, la ne à lascià de 98 egn chest an ai 26 de setember.
Ai 23 de dezember ence P. Alberto l é jit sun Paradis a festejar l Nadal del Bambin con ela e si frades.
La burta neva é ruada dal Ecuador ai 23 da sera: do aer conzelebrà la messa e aer tout part a n moment convivial coi parochiegn, no l se à sentù tant ben e l é se n jit te cambra, ma l'infermiera jita da el pech do no l à più podù far nia per l reanimar.
P. Alberto l à lurà per n muie de egn coi Shuar "te l'Oriente", l à ence metù su na scola de agraria e metù a jir n muie de coltivazion te la miscion de a Sevilla don Bosco vejin a Macas, l usc de l'Amazonia ecuadoriana, dapò l é stat a Cuenca, la terza zità del Ecuador su la Sierra, e en ultima a Quito. Tel ultim salut dant da la sepoltura l é stat compagnà da sia comunanza salesiana e ecuadoriana ai 24 de dezember a Lumbisì, na parochia vejina a Quito. Chiò a l recordar, ensema con la sor Rosetta e l fra Remo te l'Australia, n muie de nevoes, parenc, amisc e l Grop Miscionarie Freinademetz.
L Segnoredie ge darà merit de dut l ben che l à fat.  (Lucia Gross)