La Usc di Ladins

Tel passà, descheche à sotrissà i reladores, la mont de Ciareja no l é stat n lech de spartijon, ma n post de enconter anter la comunanzes de Fascia e Neva. N enconter che, fazile per la pruma outa, se à renovà forin Mont al Hotel Gran en sabeda passèda te n domesdì de musega, de lengac e de storia che à leà da beterno en ca la doi valèdes.

L domesdì, endrezà da l’Union di Ladins de Fascia e dal Bildungsausschuss de Neva, l é stat avert da na raprejentanza de la Musega da Vich e l é stat man a man viventà dal cor mescedà Singkreis Welschnofen. I saluc dantfora é rué dal diretor del Hotel Giandomenico D’Affuso, da Norbert Seehauser (Bildungsausschuss), che l à rengrazià ence l’autoritèdes te sala tant fascènes che da Neva, e Fernando Brunel (Union de Fascia). L é entervegnù ence doi raprejentanc de la doi comunanzes: l ombolt de Neva Thomas Pardeller e l’assessora al turism del Comun de Sèn Jan Mara Dorich che à uzà fora l raport jà en esser anter i doi Comuns. La diretora Nives Iori à metù dant l program del domesdì e l’à uzà fora l fat che la doi comunanzes, enceben che les fae pèrt de doi teritories desvalives, les spartesc na storia en comun, fata de relazions e vejinanza, leames sconec te la fizes de la storia e te la memoria di lesc, di mic e de la persones e che va descorii e touc endò ca.  

Podede lejer dut su La Usc stampèda dai 10 de messèl da ciapèr te la boteighes de sfoes de la valèdes ladines o tras abonament (info:www.lausc.it/abo o abo e-paper)



 (Nicoletta Riz)