La Usc di Ladins

Le Raiun soziosanitar a Picolin deura sües portes chësta sabeda ai 24 d’otober dales 10:00 ales 16:00, y inviëia a n iade de descurida particolar. Le motto dl de é “Na ciasa por döta la vita!”, deache le Raiun acompagnëia gonot les porsones te fases de vita dër desvalies, zënza che an le sais.  Cun na ciacia al tesur fora por la ciasa, pó i pici y i gragn vijitadus descurí cater staziuns: 1) Nasce - mëte man bun la vita, 2) Mituns y jogn - crësce deboriada, 3) Adulc - vire bun y 4) Porsones de tëmp atives - bun acompagnades. Indlunch él punc de informaziun, incuntades personales y de pices sorpreses. Referac cörc completëia le program. Y deache la sanité y le sté adöm pó ince fá devertí, él da ciafé n calceto, na slackline, darts, batadú, jüc por i pici, libri, facepainting y de bun da mangé. Le de vëgn ince tigní sce la strada danter Longega y Picolin é stlüta. An pó passé tres Rina y Antermëia. Nos se l’un cuntada danfora cun la responsabla di sorvisc soziai Antonia Castlunger.

Tröc che passa do la gran strada dla Val Badia vëiga la "scatora de lëgn" che é a Picolin y tröc la conësc ma sciöche post por jí a tó jö sanch. Mo chësc n’é nia vëi…
Na daldöt nia. Tla "scatora de lëgn" o "scatora dles morvëies" sciöche iö diji ion, él n gröm de sorvisc che an ne se imaginëia gnanca. I un 25 sorvisc danter ambulators sanitars y ofizi che laora tl ciamp sozial y te chësta ciasa laora za. 50 porsones!

(...)