La Usc di Ladins

L Comun General de Fascia endreza »N pest per nesc studenc« con chela de engaissèr l lurier de enrescida di students su economia, cultura, scienza e tecnologies leèdes al teritorie e a la comunanza de Fascia.
L concors met dant desvalives pesć: doi resservé per tesi de laurea de trei egn (da € 500 l un), doi per tesi de laurea magistrèla (da € 1000 l un) e un per tesi de dotorat (da € 1.000). 
Per poder tor pèrt ge vel esser enciasé te Fascia e aer ciapà l titol de studie o aer fenì l cors de studie del 2025. Se pel se scriver ite dant che sie fora i 14 de setember, ge vel scriver ite l formulèr de enscinuazion e l consegnèr a man o tras posta o tras e-mail o posta eletronica zertifichèda te ofize de canzelaria del Comun general. No vegnarà tout en conscidrazion domanes ruèdes ite do.
Te la domana, estra che i dac personèi e chi che revèrda l percors academich e de studie, ge vel enjontèr la tesi de laurea o de dotorat con apedejù na sumèda no più longia che ot piates. 
L’amiscion al concors vegn dezeduda dal Secretèr generèl verificà che l à i requisic; sarà dapodò l Consei de Procura a meter ju la graduatoria, aldò de la stima finèla arjonta e la stima media di ejames.
Per de autra informazions se pel se oujer al ofize de canzelaria (0462 764500). L avis entriech col formulèr l é a la leta online sul sit del ent te la sezion aldò.