La Usc di Ladins

Con recognoscenza e gran sens de responsabilità voi rengraziar, ensema a la lista »Inant per Sèn Jan« nesc sentadins che, te cheste litazion de Comun, i ne à sostegnù e i ne à dat soa fiduzia. Devalpai de cher! Soraldut per me, soa stima raprejenta n empegn a lurar con dedizion e trasparenza per l ben de noscia comunanza, descheche é jà fat tel passà te Comun e tel Comun General de Fascia.
Son determinada a portar inant projec che posse miorar la calità de la vita de duc noi e a lurar per n davegnir che se poje su la colaborazion e l respet. Devalpai de cher per aer cardù te me e per me aer dat, amò na uta, l met de servir noscia comunanza.
Ei, se meter a la leta domana empegn e responsabilità ma l é ence l’oportunità per far valch de utol per la comunanaza. L é con chest spirit de servije e con l’esperienza del lurier che é fat te duc chisc egn per l enteres coletif che é azetà de me meter a la leta per l Comun de Sèn Jan. Ades scomenza l lurier vero, chel che me vedarà apede a mia jent e a duta la squadra de Giulio Florian te le dezijion che revarda nosc paisc, ajache demò ensema podon far su n davegnir a l’auteza de nesc ensomesc. É aprijià n muie la concreteza, i resultac e i valores che defenesc l empegn per i sentadins desmostrà te la legislatura passada da Giulio Florian e donca sarà n piajer lurar ensema.
Voi ence ge dir devalpai ai fascegn e a le fasciane che ge à dat soa stima a la Neva Ual. Pecià che n muie de jent de Fascia ge à utà la schena a la pascion e al coraje de nesc joegn che, con gran empegn, i à desmostrà che la politica la cogn vegnir fata con idee staife, respet e vijion per l davegnir, en curt dut chel che ge mencia a la coalizion che à venciù.
La jent se lamenta che i joegn no se dasc ju, no i se tol su responsabilità! Se dapò, canche i se dasc ju, la jent no ge dasc l met de mosciar soe capazità e competenze, no se pel i cusar de pecia serietà.
Son segura ence che con la Neva Ual dut chel che l é stat fat da l’ultima aministrazion del Comun General, deslomenà dai venjidores endana la campagna litala, aessa abù l dret recognosciment ma soraldut fossa stat envià via l percors, pervedù ence tel »Studie de davegnir« portà dant da pech a la comunanza, per ruar a n Comun General de Fascia che respete i obietives de soa istituzion. Ge recorde a la jent che la »Sociazion Fassa« l’aea adertura tout su sotescrizion per tor ju l Comun General!
Bravi joegn e joene de la Neva Ual, prum partit te Fascia, devalpai de cher per chel che aede fat e jì inant con fiduzia percheche na part de la jent de Fascia la é con voi!

Mirella Florian, Sèn Jan