La Usc di Ladins

Mostra y premiaziun dl concurs
En sabeda ai 7 de novëmber vëgnel indô premié le davagnadú o la davagnadëssa dl concurs dl Fotoclub Val Badia dl 2026
Le tema de chësc ann é sté »Invern«. Tröpes fotografies é gnüdes menades ite ince en chësc iade y danter chëstes él gnü chirí fora les mius 20, che gnará tacades fora y sará da odëi tl gran salf dl Istitut Ladin Micurá de Rü, cina en domënia ai 22 de novëmber.
Le Fotoclub Val Badia inviëia dër bel düc i apascioná de fotografia ala premiaziun y ala daurida dla mostra, en sabeda ai 7 de novëmber dales 18:00, te Istitut Ladin. Ala fin dla manifestaziun sarál por düc n pice renfrësch. I ves aspetun!
Al

• 
•  

View the embedded image gallery online at:
https://www.lausc.it/manifestazions-y-evenc/32820-manifestazions-atuales-speziales#sigProId4e6130f36a

vëgn chirí esponac por na mostra söla medejina da paur
Por na mostra söla medejina da paur o medejina popolara chir le Museum Ladin de vigni sort de ogec y documënc che podess ester interessanc por svilupé chësc argomënt
Chi che á valch d’interessant dles vedles »apo­teches da paur« y che le metess ion a desposiziun, vëgn bel periá da contaté le Museum Ladin (Giovanni Mischí). En par­ticolar vëgnel chirí: tegli o bossi por unghënc, sföisc cun rezetes vedles scrites sö a man (por medié jënt y tiers), indicaziuns co che erbes, raisc o produc de tiers gnô adorá, de vedles massaries y injins da medié (flauc da sanlascé, tenaies da trá dënz, trocars), retrac de medi da paur dla Val Badia, stories interessantes de jënt …
I scriun sö y i documentun cun ligrëza i recorc de üsc antenac! Düc i ogec gnará documentá avisa, tratá cun cura y do che ai é gnüs metüs fora, gnarái indô dá zoruch. Prëibel y dilan fort de Osta colaboraziun!

Conzert de Santa Zezilia
Le conzert anual dla Müjiga da La Ila vëgn iniann metü a jí la sabeda ai 14 de novëmber, dales 20:00 tl salf dles manifestaziuns tla Ciasa de Cultura a La Ila
Al gnará porté dant toc fora de n repertore de varieté. Le conzert gnará daurí dal grup di musicontri jogn dl paisc »Mini Beat Band«, metü adöm aposta por l’ocajiun. Le grup sonará ciamó deboriada cun la Müjiga La Ila denanche i lascé le palch por le program dla serada. Sot ala bachëta dl dirighënt Konrad Tavella y de Armin Valentini, gnarál soné toc de componisć desfarënc conesciüs y che é jüs tla storia dla musiga, sciöche toc plü moderns. La Müjiga da La Ila cun so dirighënt Konrad Tavella y le presidënt David Bernardi, inviëia de cör düc da gní a d’ascuté sö le conzert de Santa Zezilia.

»De Bunes Festes«: teater a San Martin
La Uniun Teater da San Martin inviëia ala rapresentaziun de n teater da rí, che ne scona nia da n pü’ de umor fosch
En Vëia de Nadé dess dui polizisć ti porté n messaje tragich a na mëda y n berba: süa möta é morta te n inzidënt.
Mo na gran incomprenjiun fej pié ia na morona de baujies, confujiuns y avenimënc tres plü assurg. Insciö pëia ia la trama dl toch  »De Bunes Festes«, le teater che vëgn porté sön paladina a San Martin. Ara se trata de na tra­duziun ladina dl toch »The Lying Kind« de Anthony Neilson – n teater che á polarisé y descedé reaziuns desvalies. La regia é de Matteo Rubatscher. Sön paladina jobelnëia Elio Clara, Marian Planatscher, Roland Flöss, Karin Clara, Jessica Dapoz, Federica D’Urso, Christian Clara, Denise Clara. 
Les rapresentaziuns é chisc dis: vëndres ai 6.11., domënia ai 8, mercui ai 11 y sabeda ai 14.11. dales 20:00, sciöche ince la domënia ai 15.11. dales 15:00, tl salf dles uniuns a San Martin. Prenotaziuns al 0474 646030.