Do la presentaziun en vëndres dan otedé sön Plan de Corones, él ai 27 de otober gnü presenté ince a Al Plan le posizionamënt dl raiun turistich de Plan de Corones, sciöche ince le logo nü. Deplü sön chësc ciafarëise t’La Usc di Ladins da incö ai 30 de otober. Dantadöt pro la sëra a Al Plan él gnü fora la gran perplessité che dal logo ofizial él sparí la denominaziun originala ladina dla munt "Plan de Corones", tratan che al é ma plü resté le todësch "Kronplatz" cun l’injunta "Dolomites". Do i tröc intervënc portá dant chësta sëra, sciöche ince les tröpes tutes de posiziun publiches, ó la Cooperativa Turistica Al Plan/San Martin chirí na soluziun, sciöche an lí te na comunicaziun: "Le confrunt é sté sterch
y sintí, mantignin dagnora n clima de respet reziproch. Ti intervënc él gnü fora tler la orenté da sconé n patrimone cultural y identitar che rapresentëia n referimënt essenzial por le teritore. Ince les parores dl comandant di Scizeri
(Michael Ploner, adr) á porté pro a n recort sot al valur dl'identité ladina. I organisadus á tut sö cun atenziun les preocupaziuns manifestades, reconescion tan a cör che la chestiun ti stá ala comunité. Por ti jí do al confrunt él gnü pité na incuntada, preodüda l'edema che vëgn, danter i rapresentanc dl turism, dl Comun, le comandant di scizeri, n valgügn rapresentanc dla comunité y le diretur provinzial por l'istruziun, la formaziun y la cultura ladina
(André Comploi, adr)."
Rodunt André Comploi, che n’â nia sciafié da ester persënt a Al Plan, á mené ite n apel scrit, che é spo gnü porté dant chësta sëra. I ciafëis ince süa tuta de posiziun t’La Usc di 30 de otober.
La Cooperativa Turistica scrí inant: "L'incuntada dl’edema che vëgn sará l'ocajiun por jí inant cun le confrunt, ascuté sö les sensibilités desvalies y chirí deboriada soluziuns che respognes ales ghiranzes manifestades dala comunité. La orenté di rapresentanc dl turism é chëra da coltivé n dialogh davert y costrutif, renforzan la crëta reziproca y portan pro a n clima de serenité y colaboraziun, tl respet dl lingaz, dla cultura y dl'identité ladina."
(pablo)
