I dis dant de le litazion la lista L Sveiarin, dal 2020 al 2025 mendranza te Consei de Comun de Soraga, à manà fora n scrit per ladin e per talian ge fajan a saer ai litadores le rejon che no i se à prejentà a le litazion del 2025 e autre conscidrazion sul operat de l’Aministrazion de Comun, envian la jent a jir a dar ju la stima, ampò fajan valch prezisazion su co poder litar ajache l era ence la zedola del Comun General de Fascia.
L ombolt Valerio Pederiva a Rai Ladinia en lunesc ai 6 de mé l à dit che la mendranza, che fossa la lista L Sveiarin, ge à conseià ai sentadins de Soraga de no jir a litar.
Chest l é deldut faus e l ombolt l cere e l ge die ai sentadins che l é l operat de sia aministrazion che à portà al schiet resultat che i à abù. Aboncont la lista L Sveiarin la jirà inant amò più gaerta che inant tel ge far a saer a la jent del paisc de che che farà l’Aministrazion, descheche l’à fat te le doi scontrade dai 15 de jené del 2024 e dai 19 de jené del 2025.
Fernando Brunel de la Riza, per la lista L Sveiarin
