La Usc di Ladins

»ROCK’ET« - mostra nterativa
L Circolo - Lia Mostra d’Ert nvieia a pastelné na gran rachëta de carton y bambù per la mostra ROCK’ET tl self dla mostres dla Lia Mostra d’Ert, ncuei, 20 de fauré dala 19:30 inant
Plu aut, plu debota, plu inant – l moto che passenea pra la situazion politica atuela vën tëut ca per la mostra de chëst ann dl cunsëi dl Circolo – Lia mostra d’Ert. Ntan che n valgun stac se concia ite magasins de ermes y se paredlea cun si putënza, vën d’autri sotmetui. L semea che son inò te na situazion sensibla de cumpetizion che mé na ntraunida particulera possa salvé. Nce l’ert dà si cuntribut, l tleca pensé a Anish Kapoor, cunesciù per avëi i sëui dërc dl culëur »vantablack«, y à nunzià de mandé na scultura fata de spiedli tl universum. Y l ne n’ie nia l prim: bele tl 2024 à Jeff Koons mandà sun la luna 125 scultures de acel inox cun l sustëni dla SpaceX de Elon Musk.
L Circolo mëterà ora na rachëta de carton y bambù tl self dla mostres, fata cun i ulenteres l di dla giaurida. Ie pa chësta azion na gauja de discuscion, n at de pru­testa o na partezipazion po­lemica ala megalomania?
La mostra jirà inant nchin ai 1. de merz. N chël di uniràla stluta cun na »jam session/open mic« dala 20:30. Orar de giaurida: merdi – vënderdi: 16:00 – 19:00; sada y dumënia 10:00 – 12:00 y 16:00 – 19:00.

Sostëgn bunorí por families
Ester geniturs – löm y ambria; insciö sciöche i sun, vara bun y canche i me stënti, me chiri aiüt. Chësc é le slogan dl Sorvisc de Sostëgn bunorí por families. Proscima incuntada a Picolin ai 23 de forá
Al é n sorvisc por düc i geniturs che vëgn docá, geniturs susc y families cun mituns danter 0 y 3 agn, che é te situaziuns de desfida. En particolar vëgnel pité: sostëgn ales families te de ries situaziuns; soluziuns por smendrí le stres familiar; al vëgn ponsé a strategies desvalies svilupades adöm por ciafé soluziuns; renforz de döta la familia; düc i mituns dess avëi les medemes poscibilités; al dess gní realisé cosses tignon cunt dl cheder complet por sostigní la familia.
Nüsc esperc dl ciamp sanitar y sozial dá consëis aladô dles ghiranzes y ciafa deboriada soluziuns ade­guades. Le sorvisc é debann, confidenzial y volontar. Por plü informaziuns podëise se lascé adintëne al numer 333 6203945 o ala e–mail fruehe.hilfen@bzgpust.it
Le sorvisc se incuntará tl’alzada a tera dl raiun sozio­sanitar Val Badia, te chëstes dates: 23.02.26; 23.03.26; 20.04.26.

Curs de telemark a La Ila
La US La Ila mët a jí n curs por prinzipianc y progredis: 3 sëres de merz, sön la pista »Doninz« a La Ila
La Uniun Sport La Ila – se­ziun telemark, mët a jí n curs de telemark por prin­­zipianc y progredis. 
Tó pert po düc chi che á in­teres da vaghé les prö­mes otes te chësc sport.
Le pröm iade vëgn le curs tigní en mercui ai 4 de merz dales 20:00 ales 22:00, sön la pista »Do­ninz« a La Ila. Le cost é de 70,00 € (20,00 € vá sciöche iscriziun al’Uni­un Sport La Ila).
Les iscri­ziuns vëgn tutes sö pro Arthur al 329 8627658 – ma tres WhatsApp.

Generela cun sëira de film
La Lia per Natura y Usanzes nvieia a si senteda generela cun sëira de film, n vënderdi ai 27 de fauré dala 20:00 tla »Pitla sala« tla Cësa de Cultura a Urtijëi
La lia tenirà si senteda generela y daldò uniràl mustrà l film »Tian - generation Farmfluencer«.
Duc ie de cuer nviei!