La Usc di Ladins

L’Orchestra Haydn a La Ila
L’Orchestra Haydn de Balsan y Trënt é da aldí en lönesc ai 10 d’agost dales 21:00, tla Ciasa dla Cultura a La Ila, tl cheder dl Festival Badiamusica

L’Orchestra Haydn é prota­gonista de chësc program adöm cun la sopranista Ma­ria Nazarova, mëmbra dla opera da Viena, tratan che Stefano Ferra­rio condüj l’en­semble te so rode da maester dl con­zert. Le program mët en dia­­logh Antonio Salieri y Wolf­­gang Amadeus Mo­zart, dui protagonisć dla Viena dl set­cënt. L’ascuté sö se svi­lupëia sciöche n con­frunt: la orche­stra y la usc se barata jö y se respogn, insciö sciöche les plates di dui com­ponisć. Do n toch strumental vëgnel presenté n’aria, n iade de Salieri y n iade de Mozart, te n jüch de resposta y contrasć che desmostra les peculiarités de vigni autur. »Salieri vs. Mozart« presënta porchël l’incuntada via danter la tradiziun musicala taliana y chëra austriaca – n conzert rich de stimui y ispira­ziuns reziproches.

Iade

• 
•  

View the embedded image gallery online at:
https://www.lausc.it/manifestazions-y-evenc/32306-manifestazions-atuales-speziales#sigProId9051bfd2f2

musical fora por l’Europa dl 17. secul
Le »Duo Riedel & Görg« se lascia aldí pro le Festival Badiamusica, en lönesc ai 17 d’agost dales 21:00, te dlijia de Badia
I dui musizisć compagns Moritz Görg (trombëta) y Michael Riedel (orghe) acompagnëia le publich tres n iade musical dl passé. Le program prevëiga toc por trombëta y orghe che vëgn da posć europeics desvalis dl 17. secul.

N momënt par­ticolar é la pre­sentaziun dla sonada »Fantini« dala Talia – conscidrada öna dles prömes composiziuns co­nesciüdes scrites aposta por la formaziun de trombëta y orghe. Moritz Görg sona la trombëta naturala zënza val­voles, sciöche al gnô fat te döta l’Europa dl 17. secul.

Le Museum devënta musiga
»Sound spaces in the museum« é le titul de n conzert particolar tl Museum Ladin Ciastel de Tor, ai 21 d’agost dales 17:00
Ai 21 d’agost se trasformará le Museum Ladin te n corp sonur fora por chël che an pó jí. Tres n format conzertistich straordinar, de­ventará la frabica na cassa de ressonanza y n atur: locai, stighes y passaji gnará esplorá da n punt de odüda acustich y da sintí te n’atra manira. La sëra vëgn abelida dal en­semble dl Südtirol »Chromoson«, che cun süa manira prezisa y sperimentala da soné, trasformëia les carateristiches architetoniches dl museum te musiga.

I sonns nasc te posć desvalis, ai se möi tres la frabica y ti deura al publich prospetives nöies sön la lerch y le tëmp. Al gnará porté dant n valgönes prömes rapresentaziuns: »Toy Cow« de Andrea Ruocco por toy piano y en­semble, n laur nü de Davide Spina y n toch de Mathias Schmidhammer. Le program vëgn arichí da »Where the wild things are« tla verjiun nöia dl 2026 de Sara Carvalho y da d’atres operes. Al vëgn a s’al dé n’interaziun danter architetöra, movimënt y musiga con­temporana – na sëra te chëra che le museum instës devënta paladina y stromënt.

Festa alaleria a San Martin de Tor
L’Uniun dla Musiga da San Martin de Tor inviëia dër bel düc canc ala festa alaleria ai 14 y 15 de agost, sön plaza dl paiun
La festa mët man le vëndres ai 14 dales 18:00 inant, cun posci­bilité da cené. Dales 18:30 inant él intratignimënt musical cun »Idemorveia« y dales 22:00 inant sona le grup »2HZ«.
Ai 15 d’agost, festa de Santa Maria dal Ciüf, dales 11:30 inant él na matinée cun musiga söi orghi da man; dales 15:00 él la Musiga da Weitental che tëgn conzert y dales 18:00 inant sona spo »Die Fidelen Pfarrlinga«.
Ai 15 gnarál ince organisé n valgügn jüc por mituns y mitans. La Musiga da San Martin se conforta da s’odëi tröc.

Ciüfs de Santa Maria cun Loise Verginer
Ai 14 d’agost él tl Ciastel de Tor a San Martin n curs por fá i bi cësć tradizionai de ciüfs y erbes de medejina, da porté a benedí
Fá le ciüf en ocajiun de Santa Maria dal Ciüf é öna dles plü beles tradiziuns da d’isté. Por tigní inant chësta usanza, mët a jí le Museum Ladin n curs da fá i bi cësć tradizionai cun erbes da medejina y ciüfs d’urt, por i porté spo a benedí. Le curs é en vëndres ai 14 d’agost domisdé, sö dal Ciastel de Tor a San Martin. Un n grup mët man dales 14:00 y fej curs cina ales 15:30 y le secundo grup é spo dales 16:00 ales 17:30. Prëibel da se prenoté al 0474 524020 o cun na e–mail a prenotaziuns@museumladin.it.  i posć é limitá. Tla cuota d’isciziun de 15,00 € é le material bele lapró.

Isté sön la dlacia
En mercui ai 12 d’agost vëgnel tigní a Corvara n spetacul sön la dlacia cun atlec taliagn y internazionai, sciöche ince l’Ice Club Alta Badia
»1 Year, 4 Heartbeats: The Seasons« é le titul dl spetacul sön la dlacia che vëgn metü a jí en mercui ai 12 d’agost, tl stade dala dlacia a Corvara. Les jadinadësses y i jadinadus dl Ice Club Alta Badia dauriará la sëra cun na coreografia de grup, y i dui atlec locai Lea Marie Castlunger y Felix Oberbacher se mostrará te na süa esibiziun. Lapró podará le publich ince odëi n valgügn atlec profescionisć sciöche la jadinadëssa taliana Ginevra Lavinia Negrello, Elisabeth Dibbern dala Svizera, le campiun svizer y europeich dl 2025 Lukas Britschgi, le campiun todësch Genrikh Gatrung y le per Katerina Mrazkova & Daniel Mrazek dala Republica Ceca. Le spetacul vëgn acompagné dales melodies ala vidora de Pierpaolo Foti. Les chertes d’entrada pó gní cumprades bele danfora pro i ofizi turistics, sön la plata internet dl’Alta Badia o direta­mënter la sëra dla manifestaziun dales 20:15 inant al prisc de 28,00€ por i adulc, 15,00€ por i iuniors dai 7 ai 14 agn. I mituns sot a 7 agn pó ite debann.

Cunzert dl’Urchestra Sonoton
L’Urchestra Sonoton Gherdëina, sot ala direzion de Alex Designori, nvieia de cuer al cunzert da d’instà n sada ai 8 de agost dala 20:30 y n dumënia ai 9 de agost 2026 dala 18:00 sun Plaza de Chemun de Sëlva
L prugram dl cunzert cunlieia mujiga de film y disney, mujiga cunesciuda che jirà a cuer. Sëuraprò saràl da audì la prima reprejentazion de na opra nueva de Hansjörg Mutschlechner. Duc ie nviei a unì a se goder chësta esperienza de n cunzert da truepa variazion.
Chertes de ntreda ie da giapé pra la cassa da sëira, n sada dala 19:30 y n dumënia dala 17:00 inant.
N possa nce apusté danora la chertes tres la plata Facebook o Instagram dl’Urchestra Sonoton o tres l codesc QR da abiné sun i placac. I musizisć y la musizistes se ncunforta!

Opereta ladina »Franzi«
Tl zënter d’La Pli de Mareo vëgnel presenté ciamó incö 7.8., y spo ai 8.8., 9.8., y ai 13.8., 14.8., 15.8. y 16.8., tres dales 21:00, la opereta ladina nöia scrita da Iaco Rigo y Alex Trebo
La regia dla opereta ladina »Franzi« é de Erika Castlunger, la direziun musicala de Maria Craffonara. Les rapresentaziuns é ciamó chisc dis: incö vëndres ai 7.8., indoman sabeda ai 8.8., dodoman domënia ai 9.8, y spo l’edema che vëgn, jöbia ai 13.8., vëndres ai 14.8., sabeda ai 15.8. (en Santa Maria y feragost) y domënia ai 16.8.2026, dagnora dales 21:00. Les prenotaziuns di posć sentá vëgn tutes sö tres whatsapp (menan messaji de test o audio) al nr. tel. +39 393 5137302.
»Franzi« cunta na storia, y stories, che pó sozede a düc.

Imprescions de Fernando Brunel
Doman, sabeda 8 de aost da les 17:00 vegn inaugurà la mostra te Tobià de Val a Vich
Va inant la rassegna d’èrt dedichèda ai artisć ladins endrezèda da l’Union di Ladins de Fascia te Tobià de Val a Vich. Do la mostra de la operes de ROTT ades se pel veder cheles de n auter artist ladin belebon cognosciù: Fernando Brunel, president de la sociazion culturèla e patron del Tobià de Val.
Imprescions, la selezion de chèdres, ne porta a descorir la enrescida artistica de Brunel che spieia sie esser desche persona e l fon e strent leam con sia tera ladina, sia jent, sia cultura e tradizions. I sogec l é la natura de noscia valèdes, i tobié da mont, la majons, l Carnascèr fascian, i lurieres da n’outa. Te la esposizion l é da poder veder dessegnes a lapisc, depenc a èga e a elech de n artist che depenc no demò chel che l veit ma soraldut chel che l recognosc desche pèrt de sia storia. L’inaudazion é doman, sabeda ai 8 de aost da les 17:00 con la performance musicala de Sabina Willeit (ousc) e Giorgio Fasciolo (piano).  La mostra resta averta duc i dis fin ai 23 de aost da les 16:00 a les 19:00.