La Usc di Ladins

Bun de Roman, podesseste en cört te presenté a nüsc leturs y nostes leturies?
Iö sun Roman da Puntac, i á 50 agn y de mistier sunsi sotler y tapezier. Tapezier injunti ajache le laur da sotler dandaia ê ma chël de cuncé sö comoc da ciaval, scebëgn che aldedaincö minon cun sotler ince tapezier.

Co s’ára pa porté pro che t’es rové a fá chësc laur, che é tan co tl morí fora?
Mi nene ê sotler y mi berba ince. I me pënsi de ester rové a contat cun chësc monn tres mi berba, ël m’á fat gní la gola. Inlaota ch’i ê n te möt y jô a crëps, ne ciafânse nia saurí ca les vëtes da arpizé. Spo êl mi berba che m’les cujî y da ciaré pro me savôl tan bel! Insciö m’ái apascioné dl cují. Tla finada ái cumpré jö la mascin de mi berba canche al é gnü a mancé y á metü man da cují te mi tëmp lëde, bëgn ma por interes personal. Che i sun rové a fá chësc laur é sté n caje. Al é döt jü dassú.

Ciüna é pa stada la sbürla? Ci laur fajôste pa denant ?
Fat ái fat tröc laurs. Mo propi denant co mët man l’ativité da sotler êi por lascé mi secundo laur y fá ma plü le mënacrëp a tëmp plëgn. Cun la pandemia ne jôra spo sambëgn nia plü da jí sö por munt, insciö m’ái dé jö cun le cují. I á metü man da fá val’ pice laur y da dailó inant ái tres albü da laur. Por le momënt feji ma plü sotler, ciodiche al me sá bel, mo le jí a crëp y l’arpizé restará por tres öna de mies gran pasciuns! (MO)

De plu tla edizion stampeda de La Usc di Ladins o sun l e-paper a paiament www.lausc.it/e-paper