La Usc di Ladins

Mostra »The red thread«
Tl self dla mostres dla Lia Mostra d’Ert ie metui ora lëures dla cuinta tlas dl lizeum d’ert Cademia
L argumënt dla mostra »Fil Cueciun« ie unì cris ora per ti pité na gran lerch ala sculées y ai sculeies per nterpretazions y reflescions defrëntes. L ie na metafora che descëida liams che va sot, stories nturti­dledes y continuità tl tëmp, ma nce espe­rienzes y emozions persuneles. Uniuna y uniun à nterpretà chësta te­ma­tica te na maniera ndividuela, cun opres che stimulea la mënt y l cuer de chi che ti cëla.
La mostra sarà da udëi dai 3 nchin ai 12 de mei, lunesc – vënderdi: 10:00 – 12:00 y 16:00 – 19:00; sada – dumënia 10:00 – 12:00.

La scola n mostra
L Tublà da Nives nvieia ala mostra dla studëntes y di studënc dla Scola Prufesciunela per l Artejanat Artistich. La giaurida ie n mierculdi ai 8 de mei dala 11:00
Studëntes y i studënc dla Scola Prufe­sciunela per l Artejanat Artistich mët ora i resultac de si lëures tla scultura tl lën, tla decurazion pitorica, tl dessëni y tla pruietazion, tl mudelé tla mauta. Da udëi iel nce lëures fac sun l computer tla materia de aplicazion di media nueves. Sëuraprò saràl da udëi lëures ziplei dala jëunes y dai jëuni dl curs de spezialisazion de scultura.
La criazions d’uni sort dà n’idea de chël che la scola pieta, ti dajan ala sculées y sculeies l mesun de lascé luné tres y desmustré si talënt.
La mostra resta davierta nchin ai 19 de mei uni di ora dl lunesc dala 16:00 nchin la 19:00.

Rumon su nosc luech
L Chemun de Sëlva, deberieda cun la Lia per l Turism, nvieia nce chëst ann a fé pea pra l di ecologich n sada, ai 11 de mei 2024
N se anconta te Sëlva, dan la Cësa de Cultura »Oswald von Wolkenstein«, dala 8:00 daduman.
Tlo saràl i uemes di destudafuech y i lauranc de chemun, che cuor­dinerà l’azion, metan adum la grupes y les destinan ai ridli. Ëi partirà ora a duc chëi che vën a fé pea sac, manëces y n gurmel (che l Chemun lascia fé aposta per chësta manifestazion), dan che n pierà ora per l luech a tlupé su l refudam lascià ncantëur.
Duta la lies y duta la jënt de Sëlva ie nvieda de cuer a judé pea a rumé su nosta Sëlva!

L testamënt biologich
La Lia Sarëinn nvieia a na sëira de nfurmazion n con’ dl testamënt biologich – n strumënt per pudëi tò dezijions n con’ de ntervënc de medejina tl cajo che te n daunì ne fóssen nia plu boni de comuniché o to chësta dezijions
La sëira de nfurma­zion cun la duturëssa Laura Cuccarollo de Sëlva, oncologa dl spedel de Perse­non, ie ai 9 de mei dala 20:00 tla sala Gisela, tla Cësa de Paussa de Urtijëi.
Duc y dutes ie de cuer nviei y nviedes à unì a se nfurmé n chësc cont.

Barat de ciüfs, pelzes y somënzes
En mertesc ai 7 de ma dales 20:00 a San Martin de Tor
La Uniun dles Patrones dl Co­mun da San Martin, en cola­boraziun cun le Consëi de Formaziun, inviëia ince chësc ann al barat de ciüfs, pelzes y somënzes. L’apuntamënt é por en mertesc ai 7 de ma dales 20:00, tl salf di stödafüch da San Martin de Tor. Te chësta ocajiun sarál ince Rosa dai Ciöf che baia de »Abelí nüsc bi sorasc – Consëis pratics sön le manti­gnimënt di ciüfs da sorá, sorti­mënt y tan d’ater«. An dess porté alerch ciüfs, pelzes o so­mënzes che an n’adora nia plü y se tó para ci che an á mancia. I ciüfs che an porta é da dé jö pro la portina dl salf, dan le referat, dales 19:30 inant. Sce ara vá, scrí sö ci sort che al é.

Le »Iö Sun – ester nia por ester döt«
Ai 10 de ma vëgnel tigní tl Chalet Marlene a Al Plan na serada por ciaré ite te se instësc
»L’Io Sono–essere niente per essere tutto« é le titul de na serada che vëgn metüda a jí en vëndres ai 10 de ma dales 19:19, tl Chalet Marlene a Al Plan (str. Ciasé nr. 4). Na serada por talian, olache an porvará da capí che ci che sozed incër nos ia é n spidl dla realté che i un te nos – aladô dl prinzip »Sciöche al é daite, insciö él defora«. An fajará n »iade« ite te se instësc y tla interiorité coletiva, spligan i prinzips e spiritualité y porvan da ti dé n significat ai tëmps che i viun y por chi che i sun gonot emotivamënter nia arjigná. Referënta dla serada é Elisa Piva, che se dedichëia ala chirida spirituala y coach. Ara fej le stüde tla Facolté de Psicologia dla Université Unicusano de Roma. Por la serada ne vál nia debojëgn da s’anunzié. Ara é daverta a düc. Entrada: spënora lëdia.

Nosta pedia de CO2
Referat online: »Conësceste to numer de cialzá? Y tüa pedia de CO2 pa?« Düc nos lasciun na pedia: na merscia de CO2! Mo ci ó pa chël dí plü avisa?
La pedia de CO2 (chël ó dí les emisciuns de CO2, dl gas relevant por le clima) vëgn calcolada por mosoré la faziun dles ativités dla porsona söl ambiënt y plü en particolar söl clima. La pedia mostra la cuantité totala de gas che vignun de nos mëna fora sciöche resultat dles ativités desvalies y dl consum da vignidé. Tla calcolaziun él laite le consum y l’alimentaziun, la mobilité y i sposta­mënc, l’abitaziun y l’energia, le refodam y le consum de ressurses.
En ocajiun de na serada online, en lönesc ai 6 de ma dales 20:00, podëise descurí deplü y calcolé diretamënter osta pedia de CO2, tolon ca n stromënt online dër scëmpl. Al gnará dé consëis y an podará ince fá domandes y baié di resultac.
Link por la conesciun a ZOOM: https://us02web.zoom.us/j/89441915898

Inteliënza artifiziala
Ci dess pa savëi incö l’anuzadú sura l’inteliënza artifiziala? N referat ai 7 de ma a La Ila
Le KVW da La Ila y le Consëi de Formaziun Badia inviëia en mertesc ai 7 de ma dales 20:00 a n referat cun Martin Dobes tla Ciasa dla Cultura a La Ila, olache ara nen jará dla inteliënza artifiziala. Do na cörta presentaziun jarán ite sön la spligaziun y classificaziun de »inteliënza artifiziala«, por capí spo ci che ara fej aldedaincö: capí tesć y respogne, odëi sciöche na mascin, creaziun de imajes y videos, creaziun de audio y dla usc. Al gnará spo presenté les apps y les plates internet plü importantes y al gnará mostré ejëmpli pratics por vigni de. Al ne manciará nia la domanda sce la inteliënza artifiziala porta ma de bun, y sambëgn sarál ince la discusciun, olache jënt pó fá domandes. La serada fej pert dla linia de iniziatives »Schöne Neue Welt?! – Aktionstage Politische Bildung 2024«, organisada dal Ofize Formaziun dla Provinzia.

Melodies d’aisciöda a San Martin
Conzert d’aisciöda dla Musiga da San Martin de Tor, en domënia ai 5 de ma dales 20:00, tl salf dles manifestaziuns da San Martin
La Musiga da San Martin de Tor á indô le plajëi da porté dant n program desvalí imparé ite ti ultims mëisc, cun melodies tradizionales y ince toc plü moderns. Sot ala bachëta de Katrin Zingerle podarán aldí n conzert che mët man cun la marcia »Jetzt geht’s los« de Franz Lehár, ar. da Siegfried Rundel. An vá spo inant cun »Arethusa« de Johan Nijs y »Gallito« de Santiago Lope, ar. da Siegfried Rundel. La pröma pert vá a piz cun l’overtüra »Aventura« dl componist american James Swearingen. La secunda pert vëgn daurida cun la polca »Träume in die Zukunft« de Kurt Gäble, por passé spo ala pert moderna cun »Yellow Mountains« de Jacob de Haan y »Selections from The greatest Showman« de Benj Pasek y Justin Paul, ar. da Paul Murtha. Le conzert se stlüj jö cun »Bohemian Gallop« de Alfred Bösendorfer. Düc i mëmbri dla musiga Ves inviëia cun gran ligrëza a passé na sëra cun de beles melodies.

»La musiga dëida resté jogn«
Chësc le titul dl conzert d’aisciöda dla Musiga da La Val, en sabeda ai 11 de ma dales 20:30 te palestra de paisc
Sot la direziun de Stephan Ploner vëgnel porté dant n program cun 8 toc. Le conzert vëgn daurí cun »Sympatria« de Thomas Asanger, por jí inant cun le »Tannhäuser Festival« de Richard Wagner (ar. Alfred Bösendorfer) y »Aura Castrum« de Thomas Asanger. Tratan la pröma y secunda pert sarál na picia palsa cun surandada dles onoranzes, por jí inant spo cun la »Hanna Polka« de Frantisek Keller, »Begegnung« de Kurt Gäble, »A thousand years« de Christina Perry (ar. Jan van Kraeydonck), »Aladdin Medley« de Hiroki Takahashi y »Semper iuvenalis« de Günther E. Koch. La Mu­siga da La Val se conforta da podëi ves saludé.