La Usc di Ladins

Ai 17 de merz à la zentrela cherdà aiut dala ot daduman: l fova da julé a Antermoia, ulache n ël plu de tëmp se ova brujà i braces y l mus te cësadafuech. N à menà l ël tl spedel de Bulsan.
Tl medemo spedel àn menà n ël che se ova fat mel al mus tuman cun i schi, che l’ambulanza ova menà adalerch tla sënta a Puntives.
Domesdì à pona la zentrela de Plief damandà do l joler sun Ciaulonch, ulache n ël svedesc se ova rot l os dla cuessa tuman cun i schi. N l à ciarià tl joler y ie julei limpea tl spedel de Burnech, da ulache n ie inò piei via riesc de viers de Fanes ulache na schialpinista se ova rot na giama. Nce ëila àn menà tl spedel de Burnech, do che n la ova trata su cun la binda.
Ai 16 de merz ie l prim ntervënt stat mpue’ do marënda te Sëlva, ulache n jëunn fova jit dal dutor per n problem neurologich. L dutor ova pona riesc cherdà l joler, che à ciarià l pazient y ie julà limpea tl spedel de Bulsan.
Domesdì iel pona stat n segondo ntervënt per l Aiut Alpin Dolomites: sun Sasplat fova na schialpinista tumeda se fajan mel a n jenodl. Ruvei sun la luegia àn trat su l’ëila cun na binda y meneda tl spedel de Persenon.
Ai 15 de merz iel stat n ntervënt sun l purtoi dl Boé a Corvara y un sun chël de Ciampinëi te Sëlva: te tramedoi i caji se tratòvel de n nzidënt cun i schi – l prim se ova trat na sciabla ora da luegia y l segondo se ova rot na giama. Tramedoi ie unic menei cun l joler tl spedel de Persenon.

De plu tla edizion stampeda de La Usc di Ladins o sun l e-paper a paiament www.lausc.it/e-paper