La Usc di Ladins

Gran emoziun por la 40ejima ediziun dles gares de Copa dl Monn sön la Gran Risa. Danter dui dis s’ál desfiré danü les gares de schi alpin. 
En domënia ai 21 de dezëmber él gnü adaldé chëra de slalom lerch y en lönesc chëra de slalom strënt. Pro le slalom lerch s’á indô batü numerusc atlec, rová adalerch a La Ila, tla »patria dl gigant«, por se mosoré sön le percurs dla Gran Risa. Scebëgn che les condiziuns dla pista y dla nëi ê bones, n’é le percurs nia sté da sotvaluté.

La gara de slalom lerch sön la Gran Risa á indô pité spetacul: momënc nia aspetá á baraté jö i inoms rová dancá. L’austriach Marco Schwarz s’á bele alzé fora tl pröm tëmp, olache al ti é sciampé dant ai atri atlec stlujon jö le percurs te n tëmp de 1:16.00 cun na prestaziun che n’á nia lascé pro tröc fai, tratan che d’atri atlec á mostré val’ dificolté. Al é sté Lucas Pinheiro Braathen che á ataché tl secundo tëmp, sburlan jö dala posiziun plü alta Gratz, cun n tëmp final de 2:35.20 y ti sciampan dant ince ciamó a Brennsteiner, rové terzo cun n tëmp de 2:35.24. Porimpó ti é Schwarz sté bun ince tl secundo tëmp. Sciöche atlet plü asvelt á Schwarz concuisté la piza dla classifica cun n tëmp de 2:35.02, se portan a ciasa por le pröm iade la devënta sön la Gran Risa.

Manco buté ára por i atlec talians tl slalom lerch: le gherdëna Alex Vinatzer é sté le miú, arjunjon le 14ejim post te classifica, 1 n secunt y 28 centejims plü tardí dl davagnadú. Plü injö ciamó s’á archité tla classifica le marô Tobias Kastlunger al 25ejim post y dedô le talian Filippo Della Vite, ala 27ejima posiziun.


Deplü resultac ciafëise da lí tla ediziun nöia da indoman, mercui ai 24 de dezëmber!