La Usc di Ladins

L revèrda l’alimentazion, l tem cernù dai studenc per l nef numer de la revista Filoreflex, e desche semper l’é n argoment avert, che permet de vardèr la robes da n muie de ponts de veduda. La magnadiva donca no l’é demò chel che se troon te piat, ma ence dut chel che stèsc dò via, e l nutriment no cogn esser per forza demò chel per l corp, ma ence chel per l spirit.
Per meter ensema n auter bel numer del sfoi de la scola, i studenc domana ence chest’outa la colaborazion de duta la comunanza, travers doi canai de partezipazion desferenc.
L prum l’é n contest fotografich, olache dant da la fin del meis de firé duc pel manèr ite doi fotografies de bona calità en format jpg con n curt coment sil tem »Nutriment anter corp e ènema« a la direzion mail: filoreflex16@gmail.com.
L secondo l’é l costionèr per la rubrica Radar, olache chest’outa vegn domanà fora la jent sul consum consapevol e per saer coche la se compora tel jir a proveder e tel se enjignèr la magnadiva. Se trata de n costionèr sorì e anonim, da poder fèr te pec menuc e che se pel troèr al link: https://forms.gle/UgbsgmcQaG3m1dZA6 o travers l QRCode chiò sot ite.
Duc é donca envié a colaborèr a chesta bela scomenzadives di studenc dant da la fin de firé.  (Lucia Gross)