La Usc di Ladins

La aministrazions de Fascia fèsc a saer che en sabeda ai 17 de oril vegnarà orì a Sèn Jan, aló da la palestra de la scola mesènes, l nef zenter per Fascia per fèr i vazins.

L Zenter l vegnarà gestì dal Comitat local de la Crousc Checena col didament de la Protezion Zivila e col coordenament zentrèl de l’Azienda Provinzièla per i Servijes Sanitères de Trent, aldò de la prozedures e coi standard de segureza stabilii da la autoritèdes sanitères statèles e provinzièles.

Con scomenz donca en sabeda ai 17 de oril, te duc i fins de setemèna, vegnarà fat i vazins contra l Covid 19, aldò de l’età che, man a man, vegnarà autorisà da la APSS.

Te chest moment pel se prenotèr l vazin la jent dai 70 ai 80 egn e chi che à più che 80 egn che no se à amò vazinà.

La vazinazion l’é la soula soluzion che dajarà l met, mìngol a l’outa, de ruèr a na vita normala e de meter endò a jir la ativitèdes en segureza.

La aministrazions de Fascia les se à dat jù acioche l sentadin posse se vazinèr a na vida sorida ajache esser vaziné l’é n derit de duc e n doer per duc!

Se pel se prenotèr, per la senta de Sèn Jan tras l sit de la APSS a chest link: https://cup.apss.tn.it/#/walkthrough

Chi che no l’é bon de se prentèr online l pel chiamèr ite i ofizies del Servije Sozièl del Comun general de Fascia al numer 335 7223215 opuramenter 0462 764297 tegnan sot man la tessera sanitèra.