La Usc di Ladins

Semper de più i turisć che cern na vacanza da mont domana de poder se arvejinèr a la reijes del teritorie e de tor pèrt a na vida imersiva al leam sćiantif co la natura. Te Fascia l ambient no vel demò esser vardà: l rejona, l tegn su e l é nutriment. La cultura ladina à semper recognosciù la forza di ritmes biologics e l respet per i lesc. Te na epoca olache l turism da mont risia bendeché de se dobièr ai ritmes asvelc e al consum sfadious, l é ence scomenzadives che se porta dant desche n manifest de n turism alternatif, esperenzièl e de selezion. Una de chestes l é l event Ènema&Natura che é ruà a sia terza edizion. L Festival del Bonstèr Olistich porta dant n pent anter identità ladina, turism de selezion consapevol e regenerazion de la reijes da mont.

Fora per l fin de setemèna dai 5 e 6 de setember del 2026 (da les 10 dadoman a les 7 da sera), i vijitadores podarà se emprevaler de na lingia fornida de prateghes e scontrèdes compagnèdes da profescionisć del setor: massajes, cristalterapia, costelazions, yoga e ayurveda, reflessologia, osteopatia, prodoc naturèi, narazions su la erbes e n muie de auter apede. Dut chest te la sales del Oratorie de Moena. Na ocajion per se tor del temp per se enstesc, per se arvejinèr a chesta prateghes de bonstèr, se coleèr a na vida più fona a nos enstesc e al ambient che aon dintornvia.

De più su La Usc stampèda de en vender ai 4 de setember del 2026.  (MCI)