La Usc di Ladins

En jebia ai 27 de aost l é se n jit Guido Iori de Ricardo da Penia e con el na pèrt emportanta de la comunanzes de Dèlba e Penia. L é persones che no à de besegn de gran paroles per lascèr n segn fon. Persones che semplizementer les é: les é canche l é da dèr na man, canche l é da endrezèr, fornir, fèr su, didèr. Persones che fèsc pèrt de n paisc e de sia comunanza a na vida lijiera ma sentuda, e Guido l era una de chesta persones.

Te sia vita, per sacotenc de egn a la lèngia, l à dedicà con cher datol sia energia, sia gaissa e sie talenc al ben di paijes de Dèlba e Penia e en sabeda ai 29 la comunanza se à strent entorn a sia familia per ge portèr n ultim sentù salut te gejia de Dèlba. Guido l é stat pèrt del Grop di Alpins de la val de sora con chi che l à condividù momenc de lurier e de festa, scomenzadives e manifestazions, semper vertech a didèr. Medemo co la Crousc Biencia, che l à didà a meter su e olache l é stat volontadif per passa carant’egn.

L é ampò soraldut al Grop de la mèscres de Dèlba e Penia che Guido à dat con gust e amor sie cher: dant desche Bufon e dapò desche sonador e artejan de capes e de scenes. L Grop de la Mèscres lo à recordà con de bela paroles de salut e rengraziament.

Podede lejer dut l articol su La Usc stampèda de en vender ai 4 de setember del 2026