La Usc di Ladins

La costion de l’èga l é una de la prioritèdes de l’aministrazion de Comun de Sèn Jan e l é ence una de cheles che seghita a la tegnir sot prescion. Duc cognosc i problemes leé a la rei de l’èga da beiver e al fat che l bosserlai de Soal, da olache l comun ciapa la maor cantità de èga, sie te n post delicat, per via che a ogne temporèl la èghes se mocigna e se entesseea. L Comun de Sèn Jan te chisc egn l à investì n muie de ressorses, tant sies che de contribuc de la Provinzia de Trent, per concèr, potenzièr e modernisèr la rei de la èghes netes e pazes. E autertantes per ge fèr front ogne istà ai problemes de contaminazion de la èghes, che comporta provedimenc de diviet de la beiver con dejèjes grieves ai sentadins, operatores e ghesć e, de conseguenza, dans a la parbuda del setor turtistich e economich de Fascia. L ombolt Giulio Florian aea palesà jà chest istà l besegn de troèr na soluzion struturèla per garantir na fontèna de èga alternativa. Na soluzion tecnica sostegnibola che consentissa de ge fèr front a la emergenzes e per seghitèr a garantir èga neta al comun.

De chest besegn l ge n aea rejonà ence al conseier provinzièl ladin del grop Fassa Luca Guglielmi che jà a la fin de setember l aea depojità la proponeta de mozion nr 449 che empegna la Jonta provinzièla a sostegnir l’aministrazion de Comun de Sèn Jan a verifichèr la fatibilità tecnica per la realisazion de n poz de emergenza. »Chest poz fossa de utol per pompèr su èga te situazions ecezionèles de besegn – à spiegà l conseier Guglielmi - soraldut canche l’èga del resservar de Soal no pel vegnir durèda. Se trata de n entervent emportant te n’otica de prevenzion e segureza, che jissa a potenzièr la rei de la èghes del Comun de Sèn Jan e a stravardèr na ressorsa fondamentèla per la comunanza, i sentadins e la ativitèdes economiches del teritorie.« La proponeta de mozion é stata aproèda da duc i conseieres a una te la sentèda del Consei provinzièl dai 5 de november.    

De più su La Usc stampèda de en vender ai 13 de november del 2026  (Monica Cigolla)