La Usc di Ladins

En mertesc ai 11 de jená á mëda Ida Nagler vëdua Clara dl Maier da Lungiarü arjunt i 100 agn de vita y al é gnü fat festa te familia, tan inant che les condiziuns de segurté dla pandemia l’á impormetü. Ot di 11 mituns ch’ara á metü al monn, feter düc bele instësc tl’eté dla ponsiun (le plü vedl complësc ince bele prësc i 80 agn de vita!) é gnüs a ciafé la "uma", a ti dí dilan y a ti fá les mius aodanzes por la festa nia da vigni de. Gran ligrëza á mëda Ida albü che l’Ombolt dl Comun da San Martin Giorgio Costabiei, s’á tut la bria da jí a ti porté n bel smaz de ciüfs cun les mius aodanzes da pert dla jënt dl comun. Acompagné êl dala dra. Ulrike Oberhammer, ince öna di 19 nus y nëzes de mëda Ida, conesciüda ince sciöche presidënta dla consulta provinziala por la valianza di dërc.

T’La Usc di Ladins di 14 de jená podarëise lí val’ deplü sön la festa y sön la vita de mëda Ida.  (pablo)