Vigni ann vëgnel tigní a Neumarkt l’ultima findledema de aurí l’iscriziun tl liber genealogich dles ciavales jones de trëi agn. Ara se trata de na manifestaziun che chërda adalerch les ciavales plü beles de döt le Südtirol, che vëgn valutades da na giuria de esperc aladô de plü criters. La manifestaziun döra indöt trëi dis. Le pröm de vëgn les ciavales osservades y al ti vëgn de na valutaziun aladô de sciöche ares ciara fora, danter l’ater sce ares á n bel corp, na bela tlina, n bel ce, de bi edli y sce döt cant é en armonia. Al vëgn spo ince valuté le portamënt dl tier, sciöche al vá a pe y al trot. Les ciavales che ciafa les mius valutaziuns vëgn spo ince ciamó lasciades odëi la domënia y iló vëgnel fat la premiaziun. En chësc ann é 38 le ciavales Haflinger che é gnüdes alzades fora dala giuria y che á ajunt la classa de zidlamënt plü alta. Le pröm post é gnü arjunt da "C-Medina" de Christiane Karnutsch da Maran, secundo post por "Chanel AT" de Thomas Alfreider da Calfosch, che é insciö la davagnadëssa de resserva. Al terzo post s'á plazé "Cortina", la ciavala de Simon Dapoz da La Ila.
Deplü sön la manifestaziun podëise lí tla ediziun d'La Usc di Ladins dl vëndres ai 6 de ma. (kp)
»Chanel AT« y »Cortina« é feter les plü beles
L’ultima findledema de aurí él sté a Neumarkt, sciöche da tradiziun, l’iscriziun tl liber genealogich dles ciavales jones. Tla categoria di Haflinger é döes ciavales ladines rovades dancá. Ara se trata de "Chanel AT" de Thomas Alfreider da Calfosch y "Cortina" de Simon Dapoz da La Ila
Galaria retrac
- Simon Dapoz (amc) y Thomas Alfreider cun sües ciavales. (foto: Uniun di Haflinger dl Südtirol/Armin)
View the embedded image gallery online at:
https://www.lausc.it/valedes-ladines/val-badia/19463-chanel-at-y-cortina-e-feter-les-plue-beles#sigProId46019e565c
https://www.lausc.it/valedes-ladines/val-badia/19463-chanel-at-y-cortina-e-feter-les-plue-beles#sigProId46019e565c