La Usc di Ladins

Anter i intervenc metui dant tel chèder de Spazio Argento, pont de referiment teritorièl per la persones che à più che 65 egn, l é ence doi servijes emportanc semi-residenzièi, atives via per l dì, duc doi lo da la APSP de Fascia.

Chisc servijes ge dèsc didament a la persones che n à de besegn e a chi de cèsa a na vida che les posse stèr te sia cèsa più che l é meso ence col sostegnir la families che cogn se cruzièr de ge stèr do.

L prum intervent l é l Zenter di Servijes, atif da passa 15 egn, gestì dal Servije sozio-assistenzièl – Spazio Argento del Comun General de Fascia en convenzion con la APSP de Fascia, per la persones che à più che 65 egn (se vegn domanà ence con demanco) che pel per sé o che stenta mingol a se rangèr. L Zenter di Servijes l é avert trei dis en setemèna, de lunesc, mèrtesc e vender, da les 9:30 a les 16:00 e l sporc l met de fèr atività desvalives, per stèr en ton e sozialisèr, l dèsc la marena e l marindel. L é pervedù ence l servije de trasport per jir e se n jir dal zenter.

L secondo intervent enveze l é n servije nef per l teritorie de Fascia; se trata de la ‘Presa di carico diurna continuativa’ (PIC) e la se ouc a persones sora i 65 egn (se l é besegn ence sot) con gregn empedimenc personèi, che mingol les sà amò se rangèr ma che les à de besegn de aiut te l’ativitèdes da duc i dis opura che no les pel per sé ma che les pel stèr via per l dì te na strutura assistenzièla. 
Tant l ‘Zenter di servijes’ che la ‘touta en cèria via per dut l dì’ perveit che na pèrt di cosć vegne touc su da la persona o da sia familia, aldò del indicator de la condizion economica (ICEF).
De più tel articol su La Usc 
Per aer maor informazions sun chisc servijes e per aer na valutazion UVM se pel se oujer al portel di Servijes sozio-assistenzièi – Spazio Argento del Comun General de Fascia, al numer de telefon 0462/764297 o tras mail a sociale@cgf.tn.it.