La Usc di Ladins

Le vënt cialdin dl fön ne n’é te val’ posć dla provinzia de Südtirol nia na rarité. Atramënter ti paisc dla Val Badia, olache al vëgn dant plülere dainré, cis d’invern. En lönesc sëra ésera indô n iade stada tan inant. N pü’ te döta la Val Badia á le vënt á metü man da soflé dan les 7 da sëra y atira l’án ince sintí sön les temperatöres. Da -5 cina -6 gra de frëit, éson passá te püch plü co n’ora a +2 cina 3 gra de cialt. Le vënt á ciamó soflé sterch cina do les 11 da sëra, portan alüsc ince n sblauh de nëi, por s’apajé ia bel plan y porté indô les temperatöres al frëit de chisc dis, insciö che le mertesc da doman s’án indô descedé cun chi 10 gra de frëit.

Da -18 a +17°C
Intratan á le Sorvisc meteorologich dla Provinzia mené fora n bilanz de chësc mëis de jená, che é sté cialdin sura la mesaria fora. Ince chiló él sté le fön che á albü da dí la süa y á ince porté pro ala temperatöra plü alta: a Eyrs tl Vinschgau él gnü registré ai 5 de jená bëgn 17,6 gra de cialt. La temperatöra plü frëida án albü ai 27 de jená tl Sest, cun -18,3°C.

Le tëmp de chisc dis
Intratan resta le tëmp inant bel y da sorëdl. Insciö sarára ince ciamó en mercui. Domisdé dessel spo mëteman da se formé niores plü stersces, che porta la nëi tla nöt - le plü tles perts a nord dla provinzia.  (pablo)