La Usc di Ladins

Le Nadé é la festa dl chît, dla medita­ziun y dla condivijiun. Chësc s’á ince ponsé i zitadins da La Val, che por l’ocajiun s’á metü adöm por realisé na rapresentaziun teatrala, laurada fora y portada dant dai mëmbri dla comunité dantadöt por la jënt dl post. Le toch teatral é gnü porté dant en vëndres, ai 19 de dezëmber, sot al paiun tl zënter de La Val. Da n grup de laur é piada ia l’iniziativa, che á invié la jënt dl post y deplü uniuns a colaboré por la garatada dl proiet.

Incër 40 porsones á fat para, danter mitans y mituns dles scores elementares y mesanes, sciöche ince deplü mëmbri de uniuns desfarëntes.
»Al é sté bel da odëi cun ci moti­vaziun che la jënt s’á tut sö l’impëgn y á dediché tëmp por la comunité ince te chësc tëmp olache an á zënza valgamia stress«, dij la surastanta dl’Uniun dles Patrones da La Val Elisabeth Insam.
Le toch teatral é gnü lauré fora dal grup de laur, che á orü porté dant la storia da Nadé plü conesciüda, mo che nes toca tres indô danü y che al é bel da ascuté sö te chësc momënt dl ann. »Tröpa jënt á mostré l’interes da fá para y ala é jüda dër bun, la rapresentaziun é garatada«, dij la surastanta.


Deplü sön la rapresentaziun ciafëise da lí tla ediziun nöia de La Usc di Ladins de chësc vëndres, ai 16 de jená!