La Usc di Ladins

Nadia Crepaz é chersciüda sö sön le Ju de Ciaulunch, cun na uma badiota y n pere fodom. Da möta ára fat les scores tl’Alta Badia. Do avëi stlüt jö le stüde tl ciamp dla gastronomia y do ester stada demez por n valgügn agn – naota a Londra, spo tl’Australia y tla Zelanda Nöia – éra rovada indô derevers tla valada, olache ara á lauré tl setur turistich por plü sajuns alalungia.
Le some da daurí na süa ativité l’á acompagnada da tres, mo canche ara á incunté so compagn Davide che partî chësta vijiun, ára tut la dezijiun da la vaghé. Sëgn ti éra garatada y deboriada cun so compagn ára daurí na picera ativité, n restorant cun cianoa dal vin y la poscibilité de sté suranöt tla cité de Marostica. Sön mësa röiel spëisa ladina y tratan che i chedri tacá sö te restorant mostra momënc de vita da zacan, él danterite ince da odëi val’ retrat plü personal, sciöche chël dla lâ, da chëra che Nadia á imparé da fá bales y deplü rezetes ciamó: da chëstes se lascera ispiré cun so compagn canche ara vëgn da scrí le menü dl de.

La intervista ciafëise t’La Usc di Ladins di 4 de setëmber  (Intervista: Milena Obwegs)