La Usc di Ladins

Do la fasa de sperimentaziun, desfirada l’isté dl 2025, é chësc isté piada ia l’aziun cun deplü paurs che á fat para. »Adöm sön tru!« dij le slogan sön la drapamënta tacada fora sön i mesi anuzá dai paurs dl raiun por sensibilisé i ghesć che vá a pé y cun la roda sön i trus de munt. Le travert é scëmpl mo important: recordé ai vijitadus che i trus de munt n’é nia ma na lerch dedicada ales spazirades turistiches y ales ativités dl tëmp lëde, mo trus che vëgn dantadöt anuzá vigni de dai paurs por l’ativité agricola.
Cun le crësce dl aflus turistich vëgnel a s’al dé ince plü büsia sön i trus da jí a pé fora por la munt, na situaziun che se damana la condivijiun dla lerch da dötes les perts. Plü gonot á indere i paurs messü fá l’esperiënza che chësc respet n’é nia tres dé dai turisć che fej püde dl passaje di mesi, por chi che ai mëss sté sön na pert y che lascia lové sö stöp y fej fracac; zacó destürbai insciö süa spazirada. Les lamentanzes é gnüdes portades dant ala Cooperativa Turistica che á chirí deboriada al’Uniun di Paurs na manira da cherié n punt d’incuntada danter les perts.
»I savun pö che i ghesć vëgn da n contest dër desfarënt da chël dla munt y che ai ne conësc nia la realté de n raiun sciöche chësc, porchël ne capësci nia che i paurs por ejëmpl mëss passé söi trus por trasporté por ejëmpl le fëgn che vëgn sié söi pra da munt. Al é raiuns olache al é püc paurs che mëss passé, d’atri olache an é deplü paurs sön tru cun les mascins y spo vëgnel a s’al dé chësta problematica«, cunta le presidënt dl’Uniun di Paurs Badia Walter Valentin.


Liede inant tla ediziun nöia de vëndres ai 11 de setëmber!