La Usc di Ladins

Tó cosciënza de nosta presënza y dla trasformaziun che i portun tl raiun te chël che i viun é le pinsier cun chël che i dui jogn badioc Marco Anvidalfarei y Hannes Pescoller s'á dé jö tratan la realisaziun de süa istalaziun audiovisiva y imersiva. Tres imajes, sonns y l’interaziun dl vijitadú, cuntera dl svilup de n paisc da munt y dla merscia lasciada dala chersciüda dla popolaziun, n pü’ sciöche i la conesciun te nüsc paisc, olache le svilup é jü tres plü debota por mirit dl turism, che á porté ince ocajiuns nöies, mo tl medemo momënt ál gaujé na trasfiguraziun tres plü sota dl raiun. L’idea por l’istalaziun »Scioriiii« é nasciüda dl 2025 sciöche laur de tesa de laurea de Marco Anvidalfarei, studënt de grafica a Rotterdam.

En colaboraziun cun Hannes Pescoller, che á studié injinieria dl sonn a Graz, él gnü lauré fora n sböz concret dl’istalaziun. Insciö é piada ia l’inrescida sön le tema dla sostignibilité liada al raiun che ai conësc le miú, l’Alta Badia, tolon ite la natöra, la contrada, le turism, la storia di ladins, dl raiun y so svilup. L’elaboraziun dl proiet á i dui jogn porté a piz cun l’aiüt de amisc, familiars y esperc, che s’á pité da dé na man. Sciöche resultat él gnü a s’al dé n’istalaziun unica te süa sort y a chëra che i dui jogn ti á dé inom cun n pü’ de ironia: »Le Portaaal«. Ara é gnüda presentada ai 29 d'agost tl Istitut Ladin Micurá de Rü, olache an á podü la vijité por plü dis alalungia.

Deplü da lí ciafëise te La Usc di Ladins de vëndres ai 11 de setëmber!