La Usc di Ladins

Ci nen restel pa dla porsona canche sü recorc se sfrëia jö? N pü’ sciöche n jí a perde gota do gota, podesson descrí la maratia d’Alzheimer; na pordüda che vá bëgn sura chëra di plü bi recorc fora: döt le plü conesciü devënta te n iade forest. Tl mëis de setëmber, reconesciü internazionalmënter sciöche le mëis dediché ala sensibilisaziun devers dl Alzheimer, vëgnel porchël metü a jí cotan de aziuns y manifestaziuns.
Tres deplü é les porsones atocades da chësta maratia. Aladô dla »Beobachtungsstelle für Gesundheit« vir tl Südtirol incër 5 mile porsones atocades dala demënza, dui terzi de chëstes é ëres. Lapró vëgnel vigni ann pormez incër 1.200 caji nüs.
Te chësc cheder unse tut l’ocajiun da intervisté Julia Pescoller de Badia, spezialisada te neuropsicologia tl ciamp dla demënza y dl Alzheimer. 

»Le ciamp dla demënza y dl Alzheimer m’á afasciné tresfora te mi stüde, porchël ái tut la dezijiun da jí de chësc vers y da me dé jö dantadöt cun la demënza gaujada dal Alzheimer. Da öna na pert él tres plü porsones che s’amarëia de demënza, dl ater vers sán de chësta maratia ciamó püch«, cunta Julia Pescoller.

Döta l’intervista ciafëise da lí tla ediziun nöia de vëndres ai 18 de setëmber!