La Usc di Ladins

Te nüsc comuns él bëgn n gröm de uniuns, assoziaziuns y comisciuns che se dá jö cun l’interes de categories desvalies: turism, ostis, artejans y boteghiers, mo ince sport, musiga y cultura, y nia inultima mituns, families, jonëza y jënt atempada. Rodunt pro la jënt atempada á la Provinzia de Balsan odü le debojëgn da fá deplü, porchël él gnü aprové d’otober 2022 la lege por la "Promoziun y le sostëgn dl invedlamënt atif"; chësta se tol dant da dé n contribut por ti pormëte ales porsones vedles na vita poscibilmënter lungia, sana y autonoma, te so ambiënt conesciü.
Danter i provedimënc, é i comuns icherdá da nominé na consulta por la jënt atempada. Ara se trata de n organ che vá a öna cun la dorada dl’aministraziun comunala y che é de carater consultif: chësc ó dí che al é de un n vers na "orëdla por la jënt de tëmp" y pó ti porté dant al’aministraziun de Comun propostes por respogne ai debojëgns dles porsones plü vedles, te süa vita da vignidé. Dl ater vers pó la Consulta ince instëssa porté inant iniziatives che vá a bëgn dla jënt de tëmp. Chisc fins s’á tut a cör ince la consulta por la jënt atempada dl Comun de Badia. Chësta inviëia en sabeda ai 17 d’otober dales 13:30, te scora mesana da La Ila, a na incuntada por düc i seniors dl comun. Iló gnarál splighé plü avisa ci che la consulta fej y che ch’al é laite, ci che an á fat cina sëgn y ci che an ó fá tl dagní – olache les propostes é sambëgn bëgnodüdes. Al ne manciará nia val’ retrat dles ativités, n pice teater y n pü’ de musiga cun val’ da mangé y da bëre.

Deplü t’La Usc di 16 d’otober  (pablo)