La Usc di Ladins

Walk in-consulënza! Al basta passé, zënza termin!
Le sorvisc por les dependëzes dl’Aziënda Sanitara da Bornech pîta n sorvisc de consulënza por jogn, geniturs, adulc, esperc y assoziaziuns, sura alcohol, droghes, dependënza dal jüch y i.i. en colaboraziun cun le Raiun Sozial Val Badia y le Sorvisc ai Jogn. Proscim termin: 12.10.
Val’ iade unse domandes sura alcohol, droghes, nicotina, dependënza da jüch, gaming y social media, dependënza dal cumpré ite... Datrai se fajunse pinsiers por nos instësc o ince por n’atra porsona. Val’ iade fejel bun da nen baié en cört cun zacai. Les psicologhes y les assi­stëntes soziales dl Sorvisc por les dependënzes é chiló por os.
Ci vëgnel pa pité?
Consulënzes cörtes che dëida, ince sce an resta pro na consulënza sora;
Orientamënt y sostëgn;
Informaziuns sön prighi, consum, compor­tamënt y prevenziun;
Sostëgn por familiars y esperc;
Confidenzial, debann, anonim;
Zënza termin y zënza complicaziuns.
Al vëgn lauré cun l’atenziun sön ci che é im­portant incö. De pici vari che pó daidé atira!
Can vëgnel pa pité?
Chëstes jöbies, dales 17:00 ales 19:00: ai 15 d’otober, ai 12 de novëmber y ai 10 de dezëmber.
Por che pa?
Le sorvisc é ponsé por: jogn – cun y zënza ge­niturs, adulc, familiars, insegnanc, pedagogs soziai, doturs, assoziaziuns y düc chi che á domandes o se fej pinsiers. Les consulënzes vëgn pitades tl local dl Sorvisc ai jogn basite, jö por stiga sön la man ciampa.


»Bücherwelten« y atelier creatif tl MusLa
D’otober ti deura le Museum Ladin indô sües portes ai libri. Tl frabicat nü gnarál metü fora na seleziun de passa 700 libri sön le tema prinzipal de chësc ann: »Podëi«
Gran importanza ti vëgnel dé ai libri por l’infanzia y la jonëza. L’entrada ala mostra »Bücherwelten« é debann tratan l’orar de daurida dl Museum y la mostra sará da odëi tl Museum Ladin Ciastel de Tor, fina ai 1. de novëmber 2026.
N ater evënt, en colaboraziun cun l’Istitut Ladin Micurá de Rü, com­pletëia la mostra di libri: l’atelier cre­atif »Stories... y graní« cun Erika Pitscheider, olache al vëgn descurí i plü bi libri dla mostra y an se dedichëia ala creativité. L’atelier creatif é por mi­tans y mituns da 6 a 9 agn. L’entra­da é debann, al é da s’anun­zié al 0474 524020 o ala mail prenotaziuns@museumladin.it


Enrosadira Trail
La Val i fajará da paladina ala pröma ediziun ofiziala dla gara da salté »Enrosadira Trail«, ai 10 de otober
Indoman sabeda ai 10 de otober vëgnel tigní la pröma ediziun ofiziala dla gara da salté »Enrosadira Trail«. Trëi é i percursc dla gara: le plü cört é de 20 km cun 1.250 m de deslivel söpert; le mesan é 40 km lunch cun n deslivel de 2.450 m y le plü lunch é de 50 km cun bëgn 3.400 m de deslivel. Düc trëi i percursc pëia ia dala plaza de dlijia a La Val: dales 7.30 pëia ia i partezipanc dl percurs ultra, dales 8:45 chi dl percurs mesan y dales 10:00 chi dl percurs plü cört. I partezipanc saltará fora por i paisc dl’Alta Badia, por rové indô zoruch a La Val. La premiaziun gnará tignida dales 17:00 y la manifestaziun se stlüj jö cun na festa. I partezipanc pó bele gní a se tó le numer le vëndres ai 9 de otober dales 8:00 ales 18:00, tl ofize turistich y al gnará ince fat na pre­sentaziun tecnica dales 18:30.


Söi confins dla löm
Le Fotoclub Val Badia inviëia al’ultima proieziun de fotografies de chësc ann, cun Stefania Tais
En jöbia, 15 de otober dales 20:30 sarál da odëi tl gran salf dl Istitut Ladin »Micurá de Rü« a San Martin la presentaziun »Ai margini della luce–Tra l’attimo fuggente delle vette e il crepuscolo infinito« de Ste­fania Tais, fotografa dala Svizera che vir bele da deplü agn a Treviso.
La fotografa dij insciö: »Al é posć olache la löm n’é nia na cossa logica, sön les pizes di crëps él n sofl che ciütia püc momënc, tles teres dl nord él na aicia lungia che n’ó mai gní de. Na cuntia tres imajes che despassa sajuns y confins, olache la munt incunta le chît dl nord. La nëi se revelëia frëit piziënt, la löm devënta materia y val’ iade refles.«


Pröm aiüt por l’anima
Reconësce crises, ester presënc por chi che passa momënc de dificolté, damané do aiüt. De chësc y ater baiarán te n referat cun Corinne Ber­ton­cini, en mertesc ai 13 d’otober dales 19:30, te scora mesana a La Ila
L’incuntada á le fin da sensibilisé ala sanité mentala, da splighé co reconësce les crises y i segnai d’alarm de prigo de suizid, da indiché can ch’al é important da damané do aiüt y da renforzé la segurté da agí. Al vëgn dé val’ impuls pratich por pormëte emoziuns ries.
Te na manira daverta y zënza tabú, vëgnel alzé fora l’ascuté sö, la consapevolëza y le coraje da ester presënc por chi che passa n momënt de dificolté. Implü vëgnel presenté l’oferta de aiüt y de sostëgn che é bele y al vëgn stimolé la reflesciun sön so comportamënt tl raport cun porsones en dificolté.


»Dinner für Spinner« te Sëlva
La Lia dl Teater de Sëlva nvieia a unì a ti cialé al pez da rì. La première ie n sada ai 10 de utober dala 20:30 te Cësa de Cultura
Na cëina n cumpanìa, n editëur, si fëna, n reumatologh, n cunselier finanzier, n scritëur, na amanta y n finanzer.
Danter na matada y n’autra vëniel ora mpue de confujion, purteda sun palch da Juri Demetz, Ingrid Mussner, Martin Senoner, Moritz De­metz, Moritz Ber­nardi, Sara Senoner y Samuel Kasslatter, sot ala regia de Igor Demetz. L pez da rì per tudësch unirà purtà dant per l prim iede duman sada ai 10 de utober dala 20:30 te Cësa de Cultura te Sëlva. 
L’autra reprejentazions sarà n mierculdi ai 14.10. y n vënderdi ai 16.10. dala 20:30, n dumënia ai 18.10. dala 17:00, y inò dala 20:30 n mierculdi ai 21 y n sada ai 24 de utober. Chertes danora giàpen pra la Lia dl Turism de Sëlva, 0471 77900, o diretamënter pra la cassa dan l teater.


La picia paga
En lönesc ai 19 d’otober dales 15:00 él te biblioteca da La Ila n referat por mituns y jogn, ince cun geniturs, por baié de educaziun finanziara
Ti insigné ai mituns da manajé i scioldi cun responsabilité y com­pe­tënza. Do n gest da vigni de se ascogn l’educaziun finanziara, che dëida i mituns capí le valur di sciol­­di, tó dezijiuns cosciëntes y svi­lupé autonomia y sëns de respon­sabilité. La incuntada de informa­ziun é ponsada por mituns y jogn dla scora elementara y mesana, ince acompagná da n genitur.
An s’incunta en lönesc ai 19 d’oto­ber dales 15:00, te biblioteca a La Ila. Referënc é colaboradus dla Cassa Raiffeisen Val Badia. Organi­saziun: Consëi de formaziun Badia, Biblioteca y Cassa Raiffeisen.


Imajes fantasma
L’artist Simon Josef Rubatscher mostra chedri tla Studio Zona a Pedraces/Badia
La mostra personala de Simon Josef Rubatscher sará da odëi i dis 16, 17 y 18 d’otober 2026 tl Studio Zona, gestí dal‘EPL-Ert por i La­dins ODV, dales 18:00 ales 20:00. 
Les pítöres mostra na seria de portrés de porsones cheriades dala fantasia. 
Al dess ester ciaradöres che ti dá al amiradú proteziun y benedisciun da pert de n monn imaginé.


Matiné de leteratöra y musiga
Tla cornisc dl proiet »Ert tla tor« tl ciastel de Tor y Museum Ladin gnarál metü da jí en sabeda ai 17 de otober 2026 dales 10:00
Da aldí söl tema »Löm y ambria« saral i scric ori­ginai de deplü auturies y auturs iscric al’EPL-Ert por i Ladins. Dal Friul adalerch vëgn por l’ocajiun le ciantautur Alvise Nodale che portartá dant de sües cianties tl lingaz furlan.
Al sará na ocajiun dedicada ala poesia, tla parora y tl sonn. L’entrada ala matiné é debann.